İyulun 14-də Ali Məhkəmə tərəfindən “Femida Dialoq Platforması” çərçivəsində sahibkarlarla görüş keçirilir.

AZƏRTAC xəbər verir ki, görüşdə Azərbaycan Respublikası Ali Məhkəməsinin sədri İnam Kərimov, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev, Azərbaycan Respublikasının Kiçik və Orta Biznesin İnkişafı Agentliyinin idarə heyətinin sədri Orxan Məmmədov və Vəkillər Kollegiyasının sədri Anar Bağırov, sahibkarlar iştirak edirlər.

Ali Məhkəməsinin sədri İnam Kərimov çıxış edərək bildirib ki, “Femida Dialoq Platforması”nın məqsədi hüquqşünaslar, vətəndaş cəmiyyəti institutları, sahibkarlar eləcə də digər sahələrdə fəaliyyət göstərən təşkilatlarla məhkəmə-hüquq sahəsində qanunvericiliyin təkmilləşdirilməsi, ortaya çıxan problemlərin həlli və ölkəmizdə bu sahədə aparılan islahatlara dəstək vermək məqsədilə müzakirələrin aparılmasıdır.

İnam Kərimov “Femida Dialoq Platforması” çərçivəsində üçüncü görüşün sahibkarlarla keçirildiyini vurğulayaraq deyib: “Bu da təsadüfü deyil. Sahibkarlığın inkişafı dövlətimizin iqtisadi inkişaf siyasətinin əsasını təşkil edir. Yaxın tarixə diqqət yetirsək görərik ki, dövlət müstəqilliyi bərpa edildikdən sonra Azərbaycanda bazar iqtisadiyyatına keçid sürətlə baş verdi və ölkənin inkişaf strategiyası möhkəm təməllər üzərində quruldu. Müasir Azərbaycanın qurucusu Ulu Öndər Heydər Əliyevin vurğuladığı kimi, “Azərbaycan dövlətinin strateji yolu yalnız demokratiya, sərbəst iqtisadiyyat prinsiplərinin bərqərar olması, bazar iqtisadiyyatı və sahibkarlığın inkişafıdır”.

Məhz bu düşünülmüş siyasət nəticəsində ölkəmizdə makroiqtisadi sabitlik və dinamik iqtisadi inkişaf üçün əsaslı zəmin yaradılıb. Nəticədə geniş sahibkarlar təbəqəsi formalaşıb, ölkənin sosial-iqtisadi inkişafında özəl sektorun rolu daha da artıb və ümumdünya iqtisadi sisteminə inteqrasiya sahəsində mühüm nailiyyətlər əldə olunub”.