Dekabrın 26-da Ailə, Qadın və Uşaq Problemləri üzrə Dövlət Komitəsi tərəfindən cari il ərzində uşaq hüquqları, xüsusən də uşaqların inkişaf hüququ sahəsində səmərəli fəaliyyəti ilə seçilən uşaqların mükafatlandırılması məqsədilə “Qalib ölkənin qalibləri-2023” adlı tədbir keçirilib.

AZƏRTAC xəbər verir ki, tədbirdə Uşaq Səfirlər Məclisinin üzvləri və regional nümayəndələri də daxil olmaqla respublikanın bütün şəhər və rayonlarından fəallığı, xüsusi bacarıq və istedadı ilə seçilən, liderlik keyfiyyətlərinə sahib olan 100-ə yaxın uşaq iştirak edib.

Məclisin üzvləri “Ən fəal layihə təşkilatçısı”, “Ən uğurlu layihə”, “Ən fəal təlimçi”, “Uğurlu beynəlxalq təmsilçilik”, “Mübariz ruh” və “Uşaq inkişafına töhfə” adlı 6 nominasiya üzrə diplom, mükafat və hədiyyələrlə təltif olunublar.

Qeyd edək ki, mükafatlandırma mərasimi boyunca müxtəlif nominasiyalara layiq görülmüş iştirakçıların uğurlarına dair videoçarxlar nümayiş etdirilib, eyni zamanda istedadlı uşaqların ifasında musiqi nümunələri səsləndirilib.