Mayın 25-də ADA Universitetində Qoşulmama Hərəkatı Gənclər Təşkilatının (QHGT) Azərbaycan milli bölməsinin təşəbbüsü ilə Afrika Gününə və Afrika İttifaqının 60 illiyinə həsr olunmuş mədəni mübadilə tədbiri keçirilib.

AZƏRTAC xəbər verir ki, tədbir Qoşulmama Hərəkatının üzv dövlətlərinin gənclərini, eləcə də yerli gəncləri bir araya gətirib.

Tədbirdə Xarici İşlər Nazirliyinin Beynəlxalq təhlükəsizlik şöbəsinin birinci katibi Əsmər Yusifzadə və QHGT-nin sədri Orduxan Qəhrəmanzadə açılış nitqi ilə çıxış ediblər.

Bildirilib ki, tədbirin əsas məqsədi gəncləri Afrikanın rəngarəng və qədim mədəniyyəti ilə daha yaxından tanış etmək, habelə mədəni həmrəyliyin, müxtəlifliyin, eləcə də qitənin mədəni irsinin təşviq olunması üçün mühit yaratmaqdır.

Qeyd edilib ki, Azərbaycan Prezidenti İlham Əliyevin rəhbərliyi ilə ölkəmizin Hərəkata sədrliyi dövründə irəli sürülən təşəbbüslərdən biri olan Qoşulmama Hərəkatının Gənclər Təşkilatının təsis olunması qurumun institusional inkişafı üçün atılmış vacib addımlardan biridir. Vurğulanıb ki, birillik fəaliyyəti dövründə Gənclər Təşkilatı Qoşulmama Hərəkatına üzv ölkələrin gəncləri üçün aparıcı beynəlxalq platformalardan birinə çevrilməsi istiqamətində qətiyyətli addımlar atıb.

Sonra hazırda Azərbaycanda yaşayan afrikalı gənclər qitənin zəngin mədəniyyəti ilə bağlı rəngarəng təqdimatlar, musiqi nömrələri, milli rəqslər, milli mətbəx nümunələri təqdim ediblər.

Afrikalı gənclərin iştirakı ilə baş tutan hibrid tədbirdə gənclərin Afrika Günü ilə bağlı təəssüratlarını və fikirlərini bölüşdükləri videoçarx təqdim olunub.

Sonda mükafatlandırma mərasimi olub.