İyunun 22-də ADA Universitetinin nəzdində fəaliyyət göstərən İnkişaf və Diplomatiya İnstitutu (IDD) və Azərbaycan Respublikası Rəqəmsal İnkişaf və Nəqliyyat Nazirliyinin birgə əməkdaşlığı çərçivəsində həyata keçirilən təlim proqramının bağlanış mərasimi olub. ADA Universitetində keçirilən tədbirdə intensiv təlim keçmiş iştirakçıların nailiyyətləri və peşəkar yüksəlişləri qeyd edilib.

AZƏRTAC xəbər verir ki, ötən ilin oktyabr ayından etibarən başlayan təlim proqramı Rəqəmsal İnkişaf və Nəqliyyat Nazirliyinin müxtəlif qurumlarını təmsil edən 200 əməkdaşı bir araya gətirib. Nazirlikdə fəaliyyət göstərən peşəkarların potensialının gücləndirilməsi və kadrların fəaliyyətində səmərəliliyin artırılması məqsədilə keçirilən proqram müxtəlif sessiyalar və interaktiv seminarlarla iştirakçıları əvəzolunmaz bilik və praktiki bacarıqlarla təmin edib.

Tədbirdə İnkişaf və Diplomatiya İnstitutunun İxtisasartırma proqramlarının rəhbəri Nərgiz İsmayılova çıxış edərək proqramın uğurla həyata keçirilməsindəki roluna görə təşkilatçılara, qonaqlara və iştirakçılara minnətdarlığını bildirib. O qeyd edib ki, proqram çərçivəsində iştirakçılara 11 mövzu ətrafında hərtərəfli anlayış əldə etməyə imkan verən bir sıra sessiyalar, seminarlar və praktiki məşğələlər keçirilib.

Rəqəmsal inkişaf və nəqliyyat nazirinin müşaviri, İnsan resurslarının idarə edilməsi şöbəsinin müdiri Fidan Fərzəliyeva iştirakçıları proqramı başa vurmaları münasibətilə təbrik edib və proqram zamanı əldə olunan bacarıqların onlara gələcək karyeralarında uğur qazandıracağına əminliyini bildirib.

ADA Universitetinin Dövlət, xarici və tələbə işləri üzrə prorektorunun müşaviri, İnkişaf və Diplomatiya İnstitutunun direktor müavini Aygün Hacıyeva iştirakçıların peşəkar inkişafının təşviqində Rəqəmsal İnkişaf və Nəqliyyat Nazirliyi ilə birgə göstərilən səylərdən və bu sahədə əməkdaşlığın əhəmiyyətindən bəhs edib.

Səkkiz ay davam edən intensiv proqramda iştirak edən peşəkarlar öz təəssüratlarını bölüşdükdən sonra onlara sertifikatlar təqdim edilib və xatirə şəkli çəkdirilib.