Sentyabrın 12-də Amerika Birləşmiş Ştatlarının (ABŞ) Azərbaycandakı səfirliyinin İctimaiyyətlə əlaqələr şöbəsinin rəhbəri Maykl Xaket, mətbuat katibi Entoni Din Trenkina, ictimaiyyət və mətbuatla əlaqələr üzrə mütəxəssisi Vüqar Əbdüsəlimov AZƏRTAC-da olublar.

Qonaqlar əvvəlcə Ümummilli Lider Heydər Əliyevin, Prezident, Müzəffər Ali Baş Komandan İlham Əliyevin və birinci xanım Mehriban Əliyevanın müxtəlif tədbirlərdə iştirakını əks etdirən fotostendlərə, həmçinin AZƏRTAC-ın müxtəlif dövrlərdə istifadə etdiyi texniki avadanlıqlardan ibarət eksponatlara baxıblar.

Sonra qonaqlarla görüşdə AZƏRTAC-ın fəaliyyəti barədə məlumat verilib. Bildirilib ki, bu il Azərbaycan milli mətbuatının 150, AZƏRTAC-ın isə 105 illik yubileyləri qeyd olunub. Diqqətə çatdırılıb ki, hazırda AZƏRTAC dünyanın müxtəlif ölkələrinin 50-dən çox informasiya agentliyi ilə tərəfdaşlıq əlaqələri qurub. Agentliyin dünyanın bir çox ölkələrində, o cümlədən ABŞ-da müxbir məntəqəsi fəaliyyət göstərir.

ABŞ-ın Azərbaycandakı səfirliyinin İctimaiyyətlə əlaqələr şöbəsinin rəhbəri Maykl Xaket görüşə görə təşəkkür edərək deyib ki, AZƏRTAC-ın peşəkarlığı yaxından izlənilir və agentliyin Azərbaycan mətbuatındakı rolu məmnunluq doğurur.

AZƏRTAC-ın redaksiyaları ilə tanış olan səfirlik nümayəndələrinə məlumat verilib ki, gün ərzində Agentliyin informasiya resurslarında Azərbaycan, rus, ingilis, alman, fransız, ərəb, Çin və ispan dillərində xəbərlər dərc edilir, foto və videomateriallar yerləşdirilir.

Qonaqlar AZƏRTAC-ın şəhid jurnalisti Məhərrəm İbrahimovun barelyefi ilə tanış olublar. Onlara şəhid həmkarımızın həyat yolu və fəaliyyəti barədə ətraflı məlumat verilib.