Abşeron rayonu ərazisində yerləşən nəqliyyat vasitələrinin utilizasiyası məntəqəsinə mediatur təşkil olunub.

AZƏRTAC xəbər verir ki, ölkəmizdə hər il istismar edilən çox sayda nəqliyyat vasitəsi köhnəlmə və yol-nəqliyyat hadisələri nəticəsində istifadəyə yararsız hala düşür. Statistik göstəricilərə əsasən, hazırda respublikada hər beş avtomobildən biri ekoloji və təhlükəsizlik standartlarına cavab vermir.

Qeyd olunub ki, bunu nəzərə alaraq, “Azərbaycan Respublikasında yol hərəkətinin təhlükəsizliyinə dair 2019–2023-cü illər üçün Dövlət Proqramı”na əsasən Azərbaycanda nəqliyyat vasitələrinin utilizasiyası proqramı hazırlanıb. Həmçinin proqramın tətbiqi ilə əlaqədar ümumilikdə 10-dan çox qanunvericilik aktına dəyişiklik və əlavələr edilib. “Tullantılar haqqında” Azərbaycan Respublikasının Qanununa uyğun olaraq, ötən müddət ərzində “Təmiz Şəhər” Açıq Səhmdar Cəmiyyəti (ASC) tərəfindən utilizatorların reyestrdə qeydiyyatı üçün tədbirlər görülüb.

Utilizator fəaliyyəti üzrə nəzərdə tutulan tələblərə cavab verən 4 utilizator (Bakıda, Abşeron rayonunda, Sumqayıtda və Gəncədə) reyestrdə qeydiyyata alınaraq istismar müddəti başa çatan, eləcə də istifadəyə yararsız nəqliyyat vasitələrinin qəbuluna başlanılıb. Bildirilib ki, nəqliyyat vasitələrinin utilizasiyaya təqdim olunmasını asanlaşdırmaq məqsədilə elektron portal istifadəyə verilib.

Mövcud tələblərə əsasən, “Yol hərəkəti haqqında” Qanunla müəyyən edilən qaydada əvvəlcə nəqliyyat vasitəsi dövlət qeydiyyatı üzrə daimi uçotdan çıxarılmalıdır. Daha sonra zəruri məlumatlar istifadəyə verilmiş www.nvu.gov.az elektron portalına daxil edilərək, ərizəçiyə göndərilən elektron məlumat əsasında nəqliyyat vasitəsi qəbul məntəqəsinə təhvil verilməlidir.

Nəqliyyat vasitəsi utilizasiyaya təqdim olunduqdan sonra onu utilizatora təhvil verən şəxsə təsdiqedici sənəd təqdim edilir. Həmin sənəd əsasında birdəfəlik ödəniş və ya yerli istehsal yeni nəqliyyat vasitəsi almaq üçün güzəşt almaq mümkündür.

“Təmiz Şəhər” ASC-nin operatorluğu ilə həyata keçirilən prosesdə ötən ilin oktyabr ayından indiyə qədər 30 min nəqliyyat vasitəsi utilizasiyaya verilib və bu rəqəm hər gün artmaqdadır.

Nəqliyyat vasitələrinin utilizasiyası proqramı çərçivəsində 1687 ədəd yerli istehsal yeni nəqliyyat vasitəsinin güzəştlə satışı həyata keçirilib, 1 milyon manatdan çox birdəfəlik ödəniş isə ərizəçilərin bank hesabına ödənilib.

Məlumat verilib ki, 2025-ci il istehsalı olan 5 avtomobil ultizasiyaya verilib. Onlar qəzaya düşən və yaxud yanmış maşınlardır.

Ölkədə utilizasiyaya verilən avtomobilərinin köhnəsi 1948-ci il, ən yenisi isə 2025-ci il istehsalı olub. Həmçinin qeyd edilib ki, 1969-cu ilə qədər istehsal olunan 110 , 1970-1979 arasında istehsal olunan 4154, 1980-1989-cu illər arasında istehsal olunan 11 min 995, 1990-1999-cu illər arasında istehsal olunan 9715, 2000-2009-cu illər arasında istehsal olunan 3226,2010-2019-cu illər arasında istehsal olunan 751, 2020-2025-ci illər arasında isə istehsal olunan 49 avtomobil ultizasiyaya verilib.

Qeyd edək ki, nəqliyyat vasitələrinin utilizasiyaya verilməsi könüllülük prinsipi əsasında aparılır və məcburi xarakter daşımır.