Həştərxan, 1 dekabr, Leyla Muradzadə, AZƏRTAC

Həştərxanda səfərdə olan Abşeron Rayon İcra Hakimiyyətinin başçısı Abdin Fərzəliyevin Rusiya Federasiyası Həştərxan vilayətinin qubernatoru İqor Babuşkin ilə görüşü olub.

AZƏRTAC xəbər verir ki, Həştərxan vilayətinin qubernatoru İqor Babuşkin bu il vilayətdə Azərbaycan xalqının Ümummilli Lideri Heydər Əliyevin anadan olmasının 100 illiyinə həsr olunmuş bır sıra təntənəli tədbirlərin keçirildiyini qeyd edib. O vurğulayıb ki, xalqlarımızı səmimi dostluq münasibətləri birləşdirir. Qubernator əmin olduğunu bildirib ki, ölkələrimiz möhkəm tərəfdaşlığı davam etdirəcək və gələcəkdə də belə tədbirlər təşkil olunacaq.

İqor Babuşkin diqqətə çatdırıb ki, bu ay onun Azərbaycana səfəri və Prezident İlham Əliyev ilə görüşü gözlənilir.

Abşeron Rayon İcra Hakimiyyətinin başçısı Abdin Fərzəliyev, öz növbəsində, səmimi qəbula görə Həştərxan vilayətinin qubernatoru İqor Babuşkinə təşəkkürünü bildirib. O qeyd edib ki, Həştərxanda Azərbaycan xalqının Ümummilli Lideri Heydər Əliyevin anadan olmasının 100 illiyinə həsr olunmuş silsilə tədbirlərin keçirilməsi Azərbaycanda yüksək qiymətləndirilir və mehriban qonşuluq münasibətlərinin təzahürüdür.

A.Fərzəliyev xatırladıb ki, bu ilin aprelində Həştərxan vilayətinin qubernatoru İqor Babuşkinin rəhbərliyi ilə keçirilən “Xəzər -dostluq dənizi” motoyürüş karvanının iştirakçıları Bakıya gəliblər. Bu, münasibətlərimizin yüksək səviyyəsindən xəbər verir.

Abşeron Rayon İcra Hakimiyyətinin başçısı Ulu Öndər Heydər Əliyevin xatirəsini əziz tutduqları üçün həştərxanlılara təşəkkürünü bildirib.