Sentyabrın 29-da ABŞ-da təhsil almış tələbələrin “İllik Məzunlar Qala” tədbiri keçirilib.

AZƏRTAC xəbər verir ki, tədbirdə ABŞ-ın müvəqqəti işlər vəkili Emi Karlon çıxış edib. Emi Karlon qeyd edib ki, Azərbaycana hələ yenicə gəlməsinə baxmayaraq, o, artıq özünü evində kimi hiss edir: “Azərbaycan xalqının səmimiliyi, qonaqpərvərliyi çox xoşdur. ABŞ hökuməti tərəfindən maliyyələşdirilən 8 min azərbaycanlı tələbə var. Həmin keçmiş tələbələr ölkələrimiz arasındakı əlaqələri möhkəmləndiriblər”.

ABŞ-ın Azərbaycandakı səfirliyinin mədəniyyət məsələləri üzrə müşaviri Rendi Koul tədbirin əhəmiyyətindən danışaraq bildirib ki, ABŞ-da təhsil alan tələbələr ölkələrimiz arasındakı münasibətlərin inkişaf etməsinə töhfə verirlər.

Qeyd olunub ki, avqustun 8-də Prezident Trampın vasitəçiliyi ilə Ağ Evdə əldə olunmuş sülh razılaşmasından sonra ABŞ-Azərbaycan münasibətləri həmişəkindən daha əhəmiyyətli hal alıb.

ABŞ-da təhsil alan Azərbaycanlı Tələbələr Assosiasiyasının rəhbəri Nəzrin Quliyeva tələbələri təbrik edib.

Tədbirin sonunda məzun olmuş tələbələr mükafatlandırılıb.