Azərbaycan Banklar Assosiasiyası (ABA) və Azərbaycan Hakimlər İttifaqı arasında əməkdaşlıq haqqında Anlaşma Memorandumu imzalanıb.

AZƏRTAC xəbər verir ki, memorandumu ABA-nın Rəyasət Heyətinin sədri Zakir Nuriyev və Azərbaycan Hakimlər İttifaqı İdarə Heyətinin sədri Ramiz Rzayev imzalayıblar.

Tədbiri giriş sözü ilə açan Z.Nuriyev iki qurum arasında konstruktiv əməkdaşlığın qurulmasına verdiyi dəstəyə görə Hakimlər İttifaqına və onun sədri Ramiz Rzayevə təşəkkürünü bildirib. Z. Nuriyev bildirib ki, memorandumun imzalanmasında məqsəd Hakimlər İttifaqı və ABA arasında qarşılıqlı əməkdaşlığın qurulması istiqamətində fəaliyyətin təşkili, bank sahəsində məhkəmə təcrübəsinin daha da təkmilləşdirilməsi və inkişaf etdirilməsi, qanunvericiliyin təkmilləşdirilməsi və ictimaiyyətin bank sahəsi ilə bağlı hüquqi maarifləndirilməsinə dəstək göstərməkdən ibarətdir.

Azərbaycan Hakimlər İttifaqı İdarə Heyətinin sədri Ramiz Rzayev çıxışında tədbirin təşkil edilməsinin əsas səbəbinin Azərbaycan Hakimlər İttifaqının fəaliyyət istiqamətlərinə müsbət təsir göstərəcək növbəti qarşılıqlı əməkdaşlıqların yaradılması və ictimaiyyətə çatdırılması olduğunu qeyd edib. R.Rzayev Azərbaycan Banklar Assosiasiyasının respublikada fəaliyyət göstərən bankların və bank olmayan kredit təşkilatlarının ortaq maraqlarını təmsil edən, bank sisteminin inkişafı və təkmilləşdirilməsi istiqamətində uğurla xidmət edən nüfuzlu bir təşkilat olduğunu vurğulayıb.

Hakimlər İttifaqının sədri Prezident İlham Əliyevin rəhbərliyi ilə məhkəmə-hüquq sahəsində aparılmış islahatların və sahibkarlığın inkişafına dəstək proqramlarının məntiqi davamı olaraq, bank sektoru təşkilatlarının hüquqi müstəvidə qarşılaşdığı elmi-nəzəri və praktiki problemlərə maarifləndirici dəstəyin verilməsinə ehtiyac yarandığını bildirərək, imzalanan memorandumun bu məsələdə qarşılıqlı əməkdaşlığa faydalı olacağına və müstəqil fəaliyyətlərə töhfələr verəcəyinə əminliyini ifadə edib.