Sentyabrın 1-də keçiriləcək Milli Məclisə növbədənkənar seçkilərlə əlaqədar dairə və məntəqə seçki komissiyalarının bütün üzvlərinin iştirakı ilə onların hazırlığının artırılması, seçki sahəsində bilik, bacarıq və işgüzar vərdişlərinin təkmilləşdirilməsi, xüsusilə protokolların düzgün doldurulması istiqamətində avqustun 13-də 8 saylı Binəqədi birinci seçki dairəsi dairə seçki komissiyasında növbəti treninq təşkil olunub.

AZƏRTAC xəbər verir ki, treninqdə çıxış edən 8 saylı Binəqədi birinci seçki dairəsi dairə seçki komissiyasının sədri Natiq Əliyev seçki dairəsi üzrə hazırda 37 seçki məntəqəsinin fəaliyyət göstərdiyini deyib. Bildirib ki, bir seçki məntəqəsinin seçki qanunvericiliyinə uyğun olaraq səsvermə gününə azı 5 gün qalmış seçki dairəsinin ərazisində yerləşən cəzaçəkmə müəssisəsində yaradılması nəzərdə tutulur.

Vurğulanıb ki, seçki dairəsi üzrə 48 min 470 seçici qeydə alınıb. Onların 44 faizini kişilər, 56 faizini isə qadınlar təşkil edir. Seçicilərin 874 nəfəri 80-100 yaşlı insanlar, 453 nəfəri isə ilk dəfə səs verəcək gənclərdir. Seçki dairəsi üzrə 2024-cü il sentyabrın 1-də 18 yaşı tamam olacaq 2 nəfər seçici var. Onlardan biri 5 saylı, digəri isə 8 saylı seçki məntəqəsinin ərazisində yaşayır.

"Azərbaycan Respublikası Mərkəzi Seçki Komissiyası tərəfindən seçki məntəqələri seçkiyə aid olan bütün zəruri avadanlıqlarla - seçki kabinələri və qutuları, seyf, ultrabənövşəyi lampalar, mürəkkəb balonları, stol, stul, kreslo, parça, generator, istilik radiatorları, fənər, məlumat lövhələri, dövlət rəmzləri olan bayraq, gerb və sair ilə təchiz olunub. Seçki dairəsi üzrə ümumilikdə 12 nəfərin deputatlığa namizədliyi qeydə alınıb. Onlardan 3 nəfəri qadın, 9 nəfəri isə kişidir. Namizədlərin təbliğat və təşviqatı üçün seçki dairəsinin ərazisində lazımi şərait mövcuddur. Belə ki, bütün seçki məntəqələrinə yaxın ərazilərdə təşviqat lövhələri quraşdırılıb, eyni zamanda, seçki dairəsinin ərazisində təbliğat məqsədilə bir qapalı və bir açıq yer müəyyən olunaraq namizədlərin ixtiyarına verilib. Bu günə qədər dairə seçki komissiyası tərəfindən 297 nəfər müşahidəçi qeydə alınıb. Onlardan 74 nəfəri siyasi partiyalar, 223 nəfəri isə öz təşəbbüsü ilə müraciət edənlərdir. Seçicilərin seçki məntəqələrinə rahat, maneəsiz gələrək səs vermələri məqsədilə seçki dairəsi üzrə bir neçə seçki məntəqəsinin dislokasiyasında əlavə və dəyişikliklər aparılıb. Əvvəlki seçkilərdə olduğu kimi, seçki dairəsi üzrə 10 seçki məntəqəsində veb-kameraların quraşdırılması nəzərdə tutulub ki, onların vasitəsilə seçki günü səsvermənin gedişatını dünyanın istənilən ölkəsindən izləmək mümkün olacaq. 2024-cü il sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə vətəndaşların seçki hüququnu pozan hərəkətlərdən (hərəkətsizlikdən) və qərarlardan şikayətlərin araşdırılması məqsədilə DSK-nın nəzdində 3 nəfərdən ibarət ekspert qrupu yaradılıb”, - deyə o əlavə edib.

Trenerlər Faiq Əliyev və Ülvi Bayramov treninq iştirakçılarına MSK tərəfindən hazırlanmış slaydların və əyani vəsaitlərin köməyi ilə iştirakçılara səsvermə günü məntəqə seçki komissiyaları üzvlərinin rol və vəzifələri, səsvermə otağının təşkil edilməsi qaydası, seçki günü müşahidəçilərin hüquqları, səsvermə günü məntəqənin açılması və s. barədə məlumat veriblər. Təlim iştirakçılarına bununla bağlı yaddaş kitabçası da təqdim edilib.

Treninqdə dairə və məntəqə seçki komissiyalarının üzvlərinin sualları cavablandırılıb.

Qeyd edək ki, treninqlər 9 saylı Binəqədi ikinci, 10 saylı Binəqədi üçüncü və 11 saylı Binəqədi-Qaradağ seçki dairələrinin dairə seçki komissiyalarında da keçirilir.