Hesabat ilində cari xərclərin qeyri-neft gəlirləri ilə təmin olunma səviyyəsi 2020-ci illə müqayisədə artıb, 2017-ci ildən sonra ilk dəfə olaraq qeyri-neft sektorunun ÜDM-in nominal artım tempi cari xərclərin dəyişimini üstələyib.
×
Hesabat ilində cari xərclərin qeyri-neft gəlirləri ilə təmin olunma səviyyəsi 2020-ci illə müqayisədə artıb, 2017-ci ildən sonra ilk dəfə olaraq qeyri-neft sektorunun ÜDM-in nominal artım tempi cari xərclərin dəyişimini üstələyib.
AZƏRTAC xəbər verir ki, bu sözləri Milli Məclisin mayın 31-də keçirilən iclasında “Azərbaycan Respublikasının 2021-ci il dövlət büdcəsinin icrası haqqında” qanun layihəsinin müzakirəsi zamanı Hesablama Palatasının sədri Vüqar Gülməmmədov deyib.
Palata sədri bildirib ki, aparılan təhlillər dövlət büdcəsindən ayrılan vəsaitlər üzrə xəzinədənkənar əməliyyatların həcminin ilbəil artdığını göstərir. Bununla bağlı iki məqam diqqətdə saxlanılmalıdır. Birincisi, xəzinədənkənar əməliyyatların həcminin çox olması gələcəkdə resurs çatışmazlığı ilə bağlı riskləri formalaşdırmaqla xərclərin maliyyələşdirilməsində çətinliklərə səbəb ola bilər. İkincisi, bu əməliyyatlar xərc öhdəliklərinin icrasının izlənilməsinə də imkan vermir. Bu məsələlər, büdcə vəsaitlərinin son istifadəçiləri üzrə məlumatların yığılması və monitorinqi, eyni zamanda, publik hüquqi şəxslər və dövlət müəssisələri üzrə büdcə vəsaitlərinin xəzinə müşayiəti ilə icrasına dair yeni mexanizmlərin qurulmasını zəruri edir.
Vüqar Gülməmmədov, həmçinin qeyd edib ki, 2021-ci ildə dövlət əsaslı vəsait qoyuluşu xərcləri üzrə keçid və infrastruktur layihələr üstünlük təşkil edib.