Mayın 18-də Bakı Ekspo Mərkəzində 15-ci Yubiley Azərbaycan Beynəlxalq Kənd Təsərrüfatı “Caspian Agro 2022” və 27-ci Azərbaycan Beynəlxalq Qida Sənayesi “InterFood Azerbaijan” sərgiləri açılıb.

AZƏRTAC xəbər verir ki, sərgilərin açılış mərasimində iştirak edən Baş nazir Əli Əsədov, kənd təsərrüfatı naziri İnam Kərimov və Milli Məclisin deputatları stendlərdə müxtəlif ölkələrin məhsulları ilə tanış olublar.

Qonaqlara yerli və xarici şirkətlərin kənd təsərrüfatı və qida sənayesi sahəsində istehsal edilən yüksəkkeyfiyyətli məhsullar və qabaqcıl texnologiyalar barədə ətraflı məlumat verilib.

Xatırladaq ki, Kənd Təsərrüfatı Nazirliyinin dəstəyi ilə keçirilən sərgidə 24 ölkədən 449 şirkət iştirak edir. Kənd təsərrüfatı sahəsində ən böyük beynəlxalq sərgi olan “Caspian Agro”da Azərbaycan, ABŞ, Böyük Britaniya, Çin, Almaniya, Gürcüstan, Niderland, İspaniya, İsrail, İtaliya, Rusiya, Türkiyə, Ukrayna, Slovakiya, Yaponiya və digər ölkələrdən şirkətlər iştirak edirlər. Sərgi çərçivəsində müxtəlif tədbirlər və müzakirələr təşkil ediləcək.

“Caspian Agro” sərgisi ilə eyni vaxtda Xəzər regionunun qida sənayesi şirkətlərinin əsas görüş yeri olan “InterFood Azerbaijan” sərgisi keçirilir. Sərginin məqsədi keyfiyyətli məhsulları bazara çıxarmaq və iştirakçılarla ziyarətçilər arasında birbaşa əlaqə yaratmaqdır.

Sərgi mayın 20-dək davam edəcək.