Sentyabrın 9-da Xəzər Media Mərkəzində 27-ci “ZOOM” Beynəlxalq Xəbər Görüntüləri Müsabiqəsinin qaliblərinin adlarının açıqlanması ilə əlaqədar mətbuat konfransı keçirilib.

AZƏRTAC xəbər verir ki, tədbirdə çıxış edən Türkiyə Xəbər Operatorları Assosiasiyasının sədri Aytekin Polatel bu il yarışmanın başqa bir formatda təşkil olduğunu, sərhədlərinin genişləndiyini bildirib. “Qırx dörd günlük İkinci Qarabağ müharibəsindəki Zəfərin ayaq səslərini Anadoludan hiss etdik və gördük. Ordumuz qazandı. Arxa planda isə bunu media olaraq dünyaya çatdırmalıyıq. Azərbaycan həqiqətlərini dünyaya bəyan etməliyik. Dünya miqyasında tanınan belə yarışmaların Azərbaycanda təşkil edilməsinə önəm veririk. Buna görə də 27-ci “ZOOM” Beynəlxalq Xəbər Görüntüləri Müsabiqəsini iki başlıqda həyata keçiririk, "ZOOM Türkiyə" və "ZOOM Azərbaycan". Əsas mövzumuz Qarabağdır. Bu minvalla da hərəkət edərək yarışmanın mükafatlandırma mərasiminə böyük əmək sərf edirik. Azərbaycan mediasının da bu təşəbbüsə qoşulması bizim üçün ayrı qürur mənbəyi oldu", - deyə Aytekin Polatel vurğulayıb.

Daha sonra müsabiqəyə təqdim olunan 190-a yaxın videomaterial arasından qaliblərin adları açıqlanıb.

Bildirilib ki, 1996-cı ildən bəri keçirilən “ZOOM” Beynəlxalq Xəbər Görüntüləri Müsabiqəsi Türkiyə Xəbər Operatorları Assosiasiyasının təşkilatçılığı ilə baş tutub. Ötən həftə İstanbulda Türkiyə və digər ölkələrdən müsabiqəyə verilən görüntüyə Türkiyə münsiflər heyətinin baxışı olub və səsvermə keçirilib. Azərbaycandan müsabiqəyə göndərilən 30 görüntüyə isə sentyabrın 8-də Xəzər Media Mərkəzində yerli mütəxəssislərin təmsil olunduğu 26 nəfərdən ibarət münsiflər heyəti tərəfindən baxış keçirilib.

Qeyd edək ki, 27-ci “ZOOM” Beynəlxalq Xəbər Görüntüləri Müsabiqəsinin qaliblərinin mükafatlandırılma mərasiminin sentyabrın sonlarında Azərbaycanda keçirilməsi planlaşdırılır.