Noyabrın 4-də Ailə, Qadın və Uşaq Problemləri üzrə Dövlət Komitəsinin təşkilatçılığı ilə 8 Noyabr-Zəfər Gününə həsr edilmiş “Zəfərə Aparan İdeya” adlı layihə müsabiqəsinin final mərhələsi keçirilib.

AZƏRTAC xəbər verir ki, tədbirdə əvvəlcə Azərbaycanın Dövlət Himni səsləndirilib, ölkəmizin ərazi bütövlüyü uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad olunub.

Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova iştirakçıları Zəfər Günü münasibətilə təbrik edərək, bu cür tədbirlərin önəmindən danışıb.

Qeyd edib ki, Zəfər Günü hər bir Azərbaycan övladında qürur hissi oyadır. Komitə sədrinin müavini bildirib ki, hər bir rayonda, məktəbdə bu cür layihələrin keçirilməsi çox önəmlidir. Çünki müxtəlif problemləri olan uşaqların daha da fəal olması, cəmiyyətə inteqrasiyası istiqamətində işlərin görülməsi vacibdir. Bu cür tədbirlərin keçirilməsi gənclərin pis vərdişlərdən uzaqlaşması üçün də faydalı ola bilər.

Təhsil Nazirliyinin De-institutlaşma və Uşaqların Müdafiəsi İdarəsinin rəisi Məlahət Hacıyeva Prezident İlham Əliyevin “Azərbaycan Respublikasında Zəfər Gününün təsis edilməsi haqqında” 2020-ci il 3 dekabr tarixli Sərəncamını xatırladıb. Bildirib ki, Zəfər Günü münasibətilə keçirilən silsilə tədbirlər gənclərimizə vətənpərvərlik hissinin təbliği üçün faydalıdır.

Daxili İşlər Nazirliyi İctimai Təhlükəsizlik İdarəsinin baş inspektoru, polis mayoru Kəmalə Ələkbərova qeyd edib ki, bu cür tədbirlərin keçirilməsi gənclərimizin savadlı, bilikli yetişməsi üçün gözəl təşəbbüsdür. Vətən müharibəsində qazanılan Qələbə isə bütün dünya azərbaycanlılarının uğurdur.

Digər çıxış edənlər Zəfər Günü münasibətilə tədbir iştirakçılarını təbrik edib, layihə təqdim edən gənclərin böyük potensiala malik olduqlarını vurğulayıblar. Həmçinin bölgələrdə də dünyagörüşlü, fəal gənclərin olduğu diqqətə çatdırılıb. Diqqətə çatdırılıb ki, bu gün ölkəmizdə gənclərin problemlərinin həlli istiqamətində faydalı işlər həyata keçirilir.

Çıxışlardan sonra “Zəfərə Aparan İdeya” adlı layihə müsabiqəsi haqqında təqdimat nümayiş olunub.

Bildirilib ki, layihə üçün qızlar oğlanlarla müqayisədə daha çox müraciət ediblər. Həmçinin müsabiqəyə erkən nikah mövzusunda daxil olan layihələr üstünlük təşkil edib.

Sonra layihə müsabiqəsinin final mərhələsinin qalibləri açıqlanıb. Birinci yeri “Ümid məktəbi" layihəsi ilə Gülnar Qasımova, ikinci yeri “Müdafiəçi” layihəsi ilə Səbinə Qasımova, üçüncü yeri isə “Səsimi eşit” layihəsi ilə Denis Asvarov tutublar.

Tədbir “Bizə Zəfər yaraşır” adlı bədii kompozisiya ilə yekunlaşıb.

Qeyd edək ki, respublika üzrə 14-18 yaş qrupları arasında keçirilən müsabiqədə ümumilikdə 358 uşağın müraciəti qeydə alınıb. Onlardan 10 yaradıcı layihə ikinci mərhələyə vəsiqə qazanıb. Ən yaradıcı 3 layihənin müəllifləri səsvermə yolu ilə qalib elan edilib.

Müsabiqənin keçirilməsində məqsəd uşaqların şəxsiyyət kimi formalaşması, vətənpərvərlik və mili-mənəvi dəyərlər ruhunda tərbiyəsi, maraq dairələrinə aid olan məsələlərdə iştirakının təmin edilməsidir