Uşaqların Beynəlxalq Müdafiəsi Günü münasibətilə AZƏRTAC-ın “Uşaq Bilik Portalı”nın və Özbəkistanın “Tonq Yulduzi” qəzetinin birgə təşkilatçılığı ilə keçirilən “Vətənin tərənnümü” mövzusunda rəsm müsabiqəsinin qalibləri iyunun 10-da mükafatlandırılıb.

Tədbirdə müsabiqənin qalibləri, onların valideynləri və agentliyin əməkdaşları iştirak ediblər.

Mərasimdə AZƏRTAC-ın İdarə Heyətinin sədri Vüqar Əliyev agentliyin beynəlxalq əməkdaşlığa mühüm önəm verdiyini vurğulayıb. O, AZƏRTAC-la Özbəkistanın “Tonq Yulduzi” uşaq və gənclər qəzeti arasında əməkdaşlıq əlaqələrindən bəhs edib. “Bu müsabiqənin məqsədi şagirdlərdə vətənpərvərlik hissini gücləndirmək, iki ölkənin uşaqları arasında dostluq və qardaşlıq əlaqələrini möhkəmləndirmək, onların yaradıcılıq qabiliyyətlərini inkişaf etdirmək, milli adət-ənənələri geniş təbliğ etmək, həmçinin istedadlı uşaqları üzə çıxarmaqdır. Təqdim edilən rəsm işləri peşəkar münsiflər heyəti tərəfindən müvafiq meyarlar üzrə qiymətləndirilib, qaliblər müəyyən olunub. Seçim zamanı münsiflər tərəfindən kreativ, fərqli, müdaxilə olunmamış yaradıcılıq nümunələrinə üstünlük verilib”, - deyə Vüqar Əliyev əlavə edib.

Sonra qaliblərə diplomlar təqdim olunub. Müsabiqədə Azərbaycan üzrə I yerə Nigar Ömərova, II yerə Afşin Sadıxzadə, III yerə isə Nuray Məmmədli layiq görülüblər.

Tədbir çərçivəsində qaliblərlə yaradıcılıqları barədə söhbət aparılıb.

Qeyd edək ki, qalib olmuş rəsmlər “Uşaq Bilik Portalı”nda və “Tonq Yulduzi” qəzetində dərc olunacaq.