Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin sifarişi ilə hazırlanan “Unudulmazlar” saytı və mobil tətbiqinin təqdimatı olub.

Tədbirdə agentliyin İdarə Heyətinin sədri Vüqar Behbudov, Milli Məclisin deputatları, qeyri-hökumət təşkilatlarının nümayəndələri və başqaları iştirak ediblər.

AZƏRTAC xəbər verir ki, V.Behbudov Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuzun möhtəşəm Zəfəri ilə yekunlaşan 44 günlük Vətən müharibəsindən sonra dövlət başçısının göstərişi əsasında şəhid ailələri və müharibə veteranları ilə bağlı genişmiqyaslı sosial dəstək proqramı icra olunduğunu qeyd edib.

Diqqətə çatdırılıb ki, proqram çərçivəsində 119 min şəxsə dəstəkyönümlü 243 min xidmət göstərilib. O cümlədən şəhid ailələri və müharibə ilə əlaqədar əlilliyi olan şəxslərə 4 min, ümumilikdə ötən dövrdə 13 minədək mənzil və fərdi ev verilib.

Bildirilib ki, postmüharibə dövründə müharibə ilə əlaqədar əlilliyi olan şəxslərə 284 avtomobil, ümumilikdə ötən dövrdə 7 min 500 avtomobil təqdim edilib. 7 minə yaxın imtiyazlı şəxs isə həmin dövrdə sanator-kurort və müalicə mərkəzlərinə yollayışla təmin olunub.

Ölkəmizin ərazi bütövlüyünün təmin olunması uğrunda döyüşlərdə şəhidlik zirvəsinə ucalan qəhrəmanlarımız, mülki şəhidlərimiz, Vətən müharibəsi ilə əlaqədar əlilliyi müəyyən olunmuş şəxslərin cəmiyyətə daha yaxından tanıdılması da diqqətdə saxlanıldığı vurğulanıb. “Unudulmazlar” saytı və mobil tətbiqinin də bu məqsədə xidmət etdiyi diqqətə çatdırılıb.

Saytda Prezident, Müzəffər Ali Baş Komandan İlham Əliyevin müharibə dövründə yazdığı tvitlər, şəhidlərimizin, müharibə ilə əlaqədar əlilliyi olan şəxslərin həyat və döyüş yolunu özündə əks etdirən məlumatlar, foto və videolar, təltifləri və ailə üzvləri haqqında məlumatlar təqdim olunur. Həmçinin ad, soyad, ata adı və digər kriteriyalar üzrə axtarış imkanı yaradılıb.

Şəhidlər və müharibə ilə əlaqədar əlilliyi olan şəxslər haqqında dolğun informasiya resursu olan mobil tətbiqi hər kəs İOS və Android sistemlərindən yükləyə bilər.

Çıxış edənlər layihənin əhəmiyyətinə diqqət çəkiblər. Bildirilib ki, həmin layihə qəhrəmanlarımızın həm ölkə daxilində, həm də xaricdə tanıdılmasına xidmət edəcək