Bakıda Mərkəzi Asiya və Cənubi Qafqaz ölkələrində ticarət və logistika sahəsində çalışan qadınları birləşdirən “Women in Trade and Transport” (Women in TLP – “Ticarət və Logistikada Qadınların Tərəfdaşlığı”) Assosiasiyasının regional strukturunun təqdimatı olub.

AZƏRTAC xəbər verir ki, tədbir davamlı nəqliyyat və ticarət üzrə “GIZ” layihəsinin, davamlı nəqliyyat və ticarət üzrə Trans-Xəzər dəhlizinin Regional İşçi Qrupunun və “Ticarət və nəqliyyat sahəsində Şərq Tərəfdaşlığı” layihəsinin dəstəyi ilə təşkil olunub.

Tədbirdə çıxış edən Mərkəzi Asiya və Qafqazda Nəqliyyat və Logistika üzrə Tərəfdaşlığın (TLP) sədri Larisa Kislyakova təşkilatın regional ofisinin açılmasının əhəmiyyətini vurğulayaraq bunun yeni birgə təşəbbüslərin başlanğıcı olacağını bildirib: “Bu gün biz strukturumuz çərçivəsində ilk addımı atırıq. Artıq 200-dən çox üzvümüz var və qadınlar getdikcə daha fəal təşəbbüslər göstərirlər. Onlara əlavə dəstəyin göstərilməsi olduqca vacibdir”.

“Women in TLP”nin Mərkəzi Asiya və Qafqaz üzrə regional strukturunun sədri Ayjan Beiseyeva çıxışında bildirib ki, təşkilat müxtəlif ölkələrdən olan mütəxəssislərin səylərini birləşdirməyə və Trans-Xəzər Beynəlxalq Nəqliyyat Marşrutu boyunca əməkdaşlığın inkişafına kömək edir.

“Artıq Mərkəzi Asiya üçün strategiya hazırlamışıq. İndi isə fəaliyyətimizi Cənubi Qafqaza genişləndirərək, Azərbaycan və Gürcüstanın özəlliklərini nəzərə alacağıq. Bu, ümumi yanaşmaların formalaşdırılmasına və ticarət-logistika sahəsində qarşıda duran əsas tapşırıqların həllinə imkan verəcək”, – deyə o vurğulayıb.

“Women in TLP Azerbaijan”ın ölkə üzrə direktoru Sabina Tanrıverdiyeva isə logistikanı “insanları və mədəniyyətləri birləşdirən körpü” adlandırıb.

“Bu gün qadınlar liderlik keyfiyyətlərini və idarəçilik bacarıqlarını nümayiş etdirərək biznesə və beynəlxalq əməkdaşlığa mühüm töhfə verirlər. Pandemiya dövründə məhz logistika ölkələr arasında əlaqəni təmin edirdi. Buna görə də qadınların bu sahədə iştirakı və onların peşəkar inkişafı xüsusi əhəmiyyət kəsb edir”, – deyə o bildirib.

Çıxış edənlər, həmçinin təşəbbüsə dəstəyə görə “GIZ” layihəsinə və Azərbaycan–Alman Ticarət Palatasına təşəkkür ediblər. Görüş iştirakçıları qeyd ediblər ki, “Women in TLP” fəaliyyəti qadınlara networking, təcrübə mübadiləsi, yeni bazarlara çıxış imkanları yaradır, həmçinin onların nəqliyyat və logistika sahələrində iştirakının genişlənməsinə töhfə verir.