Azərbaycan Respublikasının İnsan Hüquqları üzrə Müvəkkilinin (Ombudsman) tərəfdaşlığı, Gənclər Fondunun dəstəyi və Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə sentyabrın 22-də “Suveren gənclik: Hüquq və məsuliyyət” adlı konfrans təşkil edilib.

AZƏRTAC xəbər verir ki, tədbirin keçirilməsində məqsəd gənclərin hüquq biliklərinin artırılması, vətənpərvərlik və cəmiyyət qarşısında məsuliyyət hissinin gücləndirilməsi olub.

Konfrans Azərbaycanın Dövlət Himninin səsləndirilməsi ilə başlayıb, sonra Ulu Öndər Heydər Əliyevin və Azərbaycanın suverenliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib.

Tədbirdə Gənclər Fondunun İnformasiya texnologiyaları və ictimaiyyətlə əlaqələr şöbəsinin müdiri Pərvanə Cəlallı və ATGTİ-nin sədri Rəşad Zeynalov çıxış edərək konfransın əhəmiyyətindən danışıblar. Natiqlər tədbirin gəncləri vətandaşlıq və hüquq məsələləri barədə məlumatlandırmaq, onların cəmiyyət qarşısında məsuliyyətlərini dərk etmələrini təmin etmək və “Konstitusiya və Suverenlik İli” çərçivəsində fikir mübadiləsini təşviq etmək baxımından əhəmiyyətini vurğulayıblar.

Çıxışlardan sonra Odlar Yurdu Universitetinin tələbəsi, milli rəqs üzrə respublika birincisi Elmina İbadova milli rəqs ifa edib.

Daha sonra konfrans panel sessiyalarla davam edib. "Suveren gənclik: Hüquqi maariflənmə və ictimai məsuliyyət" adlı panel zamanı gənclərin sualları spikerlər tərəfindən cavablandırılıb.

Sessiyanın yekununda “Gənclərin hüquq və məsuliyyət manifesti” adlı təqdimat edilib.