Noyabrın 2-də Zəfər Günü ilə əlaqədar Diasporla İş üzrə Dövlət Komitəsində ABŞ-da yaşayan kamança ustası İmamyar Həsənovun müəllifi olduğu “Şuşa Zəfər Layihəsi” musiqi albomunun təqdimat mərasimi keçirilib.

AZƏRTAC xəbər verir ki, əvvəlcə Vətən uğrunda mübarizədə canından keçmiş qəhrəman şəhidlərimizin əziz xatirəsi bir dəqiqəlik sükutla yad edilib.

Azərbaycan Diasporuna Dəstək Fondunun icraçı direktoru Əkrəm Abdullayev çıxışında qeyd edib ki, Şuşa Azərbaycanın qədim və tarixi şəhəridir. Bildirilib ki, bu il Şuşada Zəfər Qurultayı keçirilib və bu, əlamətdar hadisədir. Qeyd edilib ki, musiqi albomunun təqdimatı, Şuşa həqiqətlərinin musiqi dili ilə çatdırılması çox gözəl təşəbbüsdür.

“Şuşa Zəfər Layihəsi” musiqi albomunun müəllifi İmamyar Həsənov Prezident İlham Əliyev tərəfindən “Tərəqqi” medalına layiq görüldüyünü deyərək bildirib: “Şuşada keçirilən Qurultaya dəvət olunmuşdum. Ölkədən kənarda yaşamağıma baxmayaraq, daim Azərbaycanı tanıtmaq üçün çalışmışam. İnanıram ki, bu istiqamətdə fəaliyyətimi bundan sonra daha da gücləndirəcəyəm”.

Sonra “Şuşa Zəfər Layihəsi” musiqi albomu ilə bağlı videoçarxı nümayiş olunub.

Tədbirdə çıxış edən Diasporla İş üzrə Dövlət Komitəsinin sədri Fuad Muradov diqqətə çatdırıb ki, Şuşa bizim qədim şəhərimizdir və biz Müzəffər Ali Baş Komandan İlham Əliyevin, rəşadətli Ordumuzun qətiyyəti və gücü hesabına ərazilərimizi 30 il sonra erməni işğalından azad etmişik. Şuşa Qurultayında xaricdə yaşayan 25 nəfər azərbaycanlı diplom və medallarla təltif edilib. Diasporla İş üzrə Dövlət Komitəsinin 50-dən çox ölkədə müxtəlif layihələri var və bu layihələrin əksəriyyəti həmin ölkələrdə yaşayan həmvətənlərimizin dəstəyi ilə həyata keçirilir. “Xaricdə yaşayan soydaşlarımız daim bizi ziyarət edir, fikir mübadiləsi aparırlar. Dünya ölkələrində yaşayan azərbaycanlılar ölkəmizlə bağlı əlamətdar günlər barədə həmin ölkələrin vətəndaşlarını məlumatlandırırlar”, - deyə komitə sədri qeyd edib.

Digər çıxış edənlər - Milli Məclis sədrinin müavini Fəzail İbrahimli və başqaları Şuşanın tarixindən, təqdim olunan musiqi albomunun önəmindən, xarici ölkələrdə yaşayan həmvətənlərimizin ölkəmizin tanıdılmasına verdikləri töhfələrdən və “Şuşa İli”nin əhəmiyyətindən danışıblar.

Qeyd edək ki, layihə çərçivəsində Şuşa şəhərində “Azərbaycan Suitası”, “Sevgili Canan”, “Dilbərim” və s kimi milli musiqi kompozisiyalarını özündə əks etdirən videokliplər çəkilib. Layihə dünya ictimaiyyətinin Azərbaycan həqiqətləri, xüsusilə ermənilər tərəfindən Qarabağda məhv edilmiş tarixi abidələr haqqında məlumatlandırılması baxımından mühüm əhəmiyyət daşıyır