Aprelin 30-u Medianın İnkişafı Agentliyi və ADA Universitetinin İxtisasartırma Proqramının birgə təşkilatçılığı ilə bir sıra dövlət orqan və qurumlarının kommunikasiyaya məsul şəxsləri üçün “Strateji kommunikasiya və böhran kommunikasiyasında yeni trendlər” mövzusunda təlimlər başa çatıb.

AZƏRTAC-ın məlumatına görə, təlimin bağlanış mərasimində çıxış edən Medianın İnkişafı Agentliyinin İcraçı direktoru Əhməd İsmayılov qeyd edib ki, informasiya sabitliyinin təmin olunması, dezinformasiyanın qarşısının alınması və ictimai marağın düzgün istiqamətləndirilməsi kommunikasiyaya məsul şəxslərin əsas prioritetlərindəndir. O vurğulayıb ki, dövlət qurumlarının media ilə konstruktiv əməkdaşlığı, məlumatların ictimaiyyətə operativ, dolğun şəkildə çatdırılması qarşılıqlı etimadın qurulmasında vacib komponentlərindəndir.

ADA Universitetinin akademik işlər üzrə prorektoru Elkin Nurməmmədov çıxışında bildirib ki, mətbuat xidmətlərinin fəaliyyətinin səmərəliliyinin artırılması məqsədilə təşkil olunan təlimlərin proqramı peşəkar mətbuat ofisinin yaradılması, jurnalistlərdən gələn sorğuların effektiv cavablandırılması və onların suallarına vaxtında, dəqiq cavablar verilməsi kimi vacib aspektləri əhatə edir. O, bu yanaşmanın mətbuat xidmətlərinin işini təkmilləşdirərək ictimaiyyətlə əlaqələrin daha da möhkəmlənməsinə kömək etdiyini diqqətə çatdırıb.

ADA Universitetinin Akademik işlər üzrə prorektorunun müşaviri, İxtisasartırma Proqramının rəhbəri Aygün Hacıyeva çıxışında qeyd edib ki, dövlət orqan və qurumlarının media subyektləri ilə əməkdaşlığını inkişaf etdirmək, qarşılıqlı kommunikasiya əlaqələrini gücləndirmək, eyni zamanda, müasir media mühitində ictimaiyyəti düzgün və operativ məlumatlandırmaq vacibdir. O diqqətə çatdırıb ki, burada əsas məqsəd mətbuat xidmətlərinin rəhbərlərinin işini daha da təkmilləşdirmək, onların fəaliyyətini müasir kommunikasiya sistemlərinə uyğunlaşdırmaq və şəffaflığı təmin etməkdir.

ADA Universitetinin professoru, İnkişaf və Diplomatiya İnstitutunun Siyasi Araşdırmalar, Təhlillər və Nəşrlər üzrə direktoru Damyan Krineviç strateji kommunikasiya, böhran halları və reputasiya məsələlərinə dair çıxış edərək ictimaiyyətlə əlaqələrə məsul şəxslərlə faydalı müzakirələr aparıb.

Təlimin sonunda iştirakçılar sertifikatla təltif olunublar.