Avqustun 31-də Bakı Beynəlxalq Multikulturalizm Mərkəzinin (BBMM) təşkilatçılığı ilə Dağ Yəhudilərinin Beynəlxalq Xeyriyyə Fondu "STMEGI" və İsraildəki Bar-İlan Universitetinin nəzdində Dahan Mərkəzinin (Dahan Centre) birgə layihəsi olan "Şimali və Şərqi Qafqaz yəhudilərinin irsi və mədəniyyəti" mövzusunda beynəlxalq elmi konfransı öz işini başa çatdırıb.

AZƏRTAC xəbər verir ki, konfransın ikinci günündə çıxış edən Aşkelon Akademik Kollecinin rektoru Şimon Şarvit, Azərbaycandakı Dağ yəhudiləri icmasının rəhbəri Melix Yevdayev, Bar-İlan Universitetinin professoru Orli Meron, Bar-İlan Universitetinin Təhsil fakültəsinin dekanı Zehavit Qross, Azərbaycandakı aşkenazilərin baş ravvini Şneor Seqal və digərləri Azərbaycandakı yəhudi icmasının tarixi, dili, kimliyi, mədəniyyəti, incəsənəti barədə məlumatlar veriblər. Həmçinin Qafqaz yəhudiləri müasir zamanda, İkinci Dünya müharibəsi dövründə dağ yəhudiləri, Azərbaycan məşəli yəhudi qadınlar və ölkəmizdəki yəhudilər haqqında fikirlərini bölüşüblər.

Konfrans qeyd olunan mövzularda aparılan panel müzakirələrlə davam edib.

Qeyd edək ki, Azərbaycan Dillər Universitetində avqustun 30-da başlayan konfransda Azərbaycan, İsrail, Rusiya, ABŞ, Fransa və digər ölkələrdən 60-dan çox tədqiqatçı-alim iştirak edib.

Konfrans Bar-İlan Universitetinin nəzdində Dahan Mərkəzi (İsrail), Bakı Beynəlxalq Multikulturalizm Mərkəzi, Azərbaycan Dillər Universiteti, Azərbaycan İlahiyyat İnstitutu, Akademik Aşkelon Kolleci (İsrail), Dağ Yəhudilərinin Beynəlxalq Xeyriyyə Fondu "STMEGI"nin birgə təşkilatçılığı ilə keçirilib.