Mayın 15-də Fövqəladə Hallar Nazirliyi, Yeni Azərbaycan Partiyasının (YAP) Yasamal rayon təşkilatı, Yasamal Rayon İcra Hakimiyyəti və Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin (RSXM) birgə təşkilatçılığı ilə “Şəhərsalma və Memarlıq İli”nə həsr olunmuş “Şəhərsalmada seysmik təhlükənin və riskin qiymətləndirilməsində yeni yanaşmalar” mövzusunda konfrans keçirilib.

AZƏRTAC xəbər verir ki, YAP Yasamal rayon təşkilatında keçirilən tədbirdə müasir şəhərsalmada nəzərə alınmalı olan vacib faktorlar, eləcə də seysmik riskin qiymətləndirilməsi kimi məsələlər bu sahəyə məsul olan dövlət qurumlarının və elmi təşkilatların nümayəndələrinin iştirakı ilə müzakirə olunub.

Əvvəlcə YAP Yasamal rayon təşkilatında müasir müstəqil Azərbaycan dövlətinin memarı və qurucusu, dünyaşöhrətli siyasi xadim, xalqımızın Ümummilli Lideri Heydər Əliyevin büstü önünə güllər düzülüb. Ulu Öndərin əziz xatirəsi ehtiramla yad edilib. Həmçinin konfrans iştirakçıları təşkilatın foyesində nümayiş olunan “Şəhərsalma və Memarlıq İli”nə həsr edilmiş sərgi ilə tanış olublar.

Tədbirdə əvvəlcə Dövlət Himni səsləndirilib, ardınca Ulu Öndər Heydər Əliyevin və ərazi bütövlüyümüz və suverenliyimiz naminə canından keçən qəhrəmanların əziz xatirəsi bir dəqiqəlik sükutla yad edilib.

Sonra Respublika Seysmoloji Xidmət Mərkəzi tərəfindən hazırlanmış “Şəhərsalma və Memarlıq İli”nə həsr olunmuş videoçarx nümayiş olunub.

Konfransın açılış mərasimində çıxış edən YAP Yasamal rayon təşkilatının sədri Bəxtiyar Nəbiyev bir neçə gündən sonra ölkəmizin daha bir beynəlxalq tədbirə - Ümumdünya Şəhərsalma Forumunun 13-cü Sessiyasına (WUF13) ev sahibliyi edəcəyini diqqətə çatdırıb. Qeyd olunub ki, məzmununa və əhatə dairəsinə görə bu Forum BMT-nin İqlim Dəyişikliyi üzrə Tərəflər Konfransından (COP) sonra ikinci ən böyük və strateji əhəmiyyətli qlobal platforma hesab olunur. Bu mühüm tədbirin Bakıda təşkili yalnız regional deyil, həm də qlobal miqyasda şəhərsalma, dayanıqlılıq və ətraf mühit sahələrində Azərbaycanın artan liderliyini nümayiş etdirir. Ulu Öndər Heydər Əliyevin Azərbaycana rəhbərlik etdiyi dövrdə respublikamızda aparılan şəhərsalma və memarlıq abidələrinin bərpası və tikintisi haqqında danışan ərazi təşkilatının sədri bu gün də ölkəmizdə quruculuq işlərinin Prezident İlham Əliyev tərəfindən uğurla davam etdirildiyini bildirib.

Qeyd olunub ki, Birinci vitse-prezident, Heydər Əliyev Fondunun prezidenti Mehriban Əliyevanın rəhbərliyi ilə mədəni və tarixi irsin qorunması və bərpası istiqamətində mühüm layihələr həyata keçirilir. Bu fəaliyyətlər milli-mənəvi dəyərlərimizin gələcək nəsillərə ötürülməsində mühüm rol oynayır.

Fövqəladə Hallar nazirinin müavini Cəbrayıl Xanlarov çıxış edərək şəhərsalmada seysmik təhlükə və riskin öyrənilməsinin əhəmiyyətindən danışıb. Azərbaycanın seysmik bölgədə yerləşdiyini vurğulayan nazir müavini ölkəmizdə aparılan şəhərsalma siyasəti, bu sahədə olan qanunvericilik bazasının təkmilləşdirilməsi, eləcə də aparılan tikinti işlərinə olan dövlət nəzarəti haqqında geniş məruzə ilə çıxış edib. Cəbrayıl Xanlarov diqqətə çatdırıb ki, urbanizasiya prosesinin genişlənməsi, çoxmərtəbəli yaşayış binalarının və yeni yaşayış massivlərinin artması şəhərsalmada seysmik risklərin daha dərindən və kompleks şəkildə qiymətləndirilməsini zəruri edir. Müasir şəhərlər yalnız memarlıq-estetik baxımdan deyil, eyni zamanda, təhlükəsizlik və dayanıqlılıq meyarları üzrə də yüksək standartlara cavab verməlidir.

Onun sözlərinə görə, seysmik təhlükənin qiymətləndirilməsi artıq təkcə elmi məsələ deyil, dövlət təhlükəsizliyi, iqtisadi inkişaf və əhalinin rifahı ilə birbaşa bağlı olan strateji istiqamətə çevrilib. Bu sahədə beynəlxalq standartların tətbiqi, innovativ yanaşmaların genişləndirilməsi və region ölkələri arasında informasiya mübadiləsinin gücləndirilməsi xüsusi əhəmiyyət daşıyır.

Nazir müavini çıxışının sonunda qeyd edib ki, hazırda Bakı şəhəri və Abşeron yarımadası üzrə seysmik mikrorayonlaşdırma işləri həyata keçirilir və bu istiqamətdə aidiyyəti dövlət qurumları ilə birgə koordinasiyalı fəaliyyət davam etdirilir.

RSXM-nin baş direktoru, AMEA-nın müxbir üzvü, professor Qurban Yetirmişli “Şəhərsalmada seysmik təhlükənin və riskin qiymətləndirilməsində yeni yanaşmalar” mövzusunda geniş məruzə ilə çıxış edib. Mərkəz tərəfindən aparılan kompleks geofiziki-seysmoloji-geodinamik və geokimyəvi tədqiqat üsullarından bəhs edən baş direktor şəhərsalmada seysmik təhlükənin və riskin öyrənilməsi sahəsində olan yeni yanaşmalar haqqında da ətraflı məlumat verib. Heç bir ölkənin təbii fəlakətlərdən sığortalı olmadığını bildirən professor Qurban Yetirmişli bildirib ki, tikinti aparılan ərazilərdə seysmik təhlükənin və riskin öyrənilməsi həm də həmin ərazidə qabaqlayıcı tədbirlərin görülməsi baxımından zərurətdir. Baş direktor bildirib ki, baş verən hadisələr və elm göstərir ki, hər bir tikilinin yerləşdiyi ərazinin seysmikliyi fərdi şəkildə öyrənilməlidir.

Tədbirdə çıxış edən Milli Məclisin deputatı Aydın Mirzəzadə bildirib ki, Bakı şəhərində və regionlarda həyata keçirilən müasir şəhərsalma siyasəti təhlükəsiz və dayanıqlı inkişaf prinsiplərinə əsaslanır. O, seysmik risklərin nəzərə alınmasının bu prosesin ayrılmaz hissəsi olduğunu vurğulayıb. Qeyd edilib ki, Ulu Öndər Heydər Əliyev tərəfindən əsası qoyulan şəhərsalma və dövlətçilik strategiyası bu gün Prezident İlham Əliyev tərəfindən müasir tələblərə uyğun şəkildə uğurla davam etdirilir. Deputat vurğulayıb ki, dövlətimizin başçısının birbaşa diqqət və qayğısı nəticəsində paytaxtda və regionlarda həyata keçirilən quruculuq işləri şəhər mühitinin təhlükəsizliyinin və əhalinin rifahının təmin olunmasına xidmət edir.