Akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin birgə təşəbbüsü ilə Beynəlxalq Qlaukoma Həftəsi çərçivəsində “Qlaukomanın müasir diaqnostikası və müalicəsi” mövzusunda elmi-praktiki konfrans keçirilir. Konfransda qlaukomanın müasir diaqnostik təhlili və müalicəsindən bəhs olunur, oftalmoloji xəstəliklərin aradan qaldırılması ilə əlaqədar fikir mübadiləsi aparılır.

AZƏRTAC xəbər verir ki, akademik Zərifə Əliyevanın anadan olmasının 100 illiyinə həsr edilən konfransda regionlardan, mərkəzdən və digər təşkilatlardan olan oftalmoloqlar təqdimatlarla çıxış edirlər. Həmçinin Türkiyədən olan mütəxəssislər onlayn formada məruzələrini təqdim edirlər.

Xatırladaq ki, dünyanın bir çox ölkəsində qeyd edilən Beynəlxalq Qlaukoma Həftəsi bu il martın 12-dən 18-dək keçirilir. Qlaukoma Həftəsi Dünya Qlaukoma və Dünya Qlaukomalı Xəstələr assosiasiyaları arasında ortaq təşəbbüsdür.