Dekabrın 24-də Müharibə, Əmək və Silahlı Qüvvələr Veteranları Təşkilatında “İlham Əliyev - Zəfər və Qələbə memarımız” mövzusunda tədbir və Aygül Bağırovanın “Qalib Sərkərdə” kitabının ikinci nəşrinin təqdimatı keçirilib.

AZƏRTAC xəbər verir ki, tədbirdə şəhid ailələri və veteranlar, ölkə ziyalıları, Milli Məclisin deputatları, media və vətəndaş cəmiyyəti institutunun təmsilçiləri iştirak ediblər.

Tədbirdə çıxış edən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov Prezident İlham Əliyevin yürütdüyü siyasətin dövlətimizi daha da gücləndirdiyini, Azərbaycanın beynəlxalq aləmdəki nüfuzunu möhkəmləndirdiyini bildirib. Polkovnik qeyd edib ki, Müzəffər Ali Baş Komandanın rəhbərliyi altında 44 günlük Vətən müharibəsində əldə edilən tarixi Qələbə 30 illik erməni işğalına son qoymaqla yanaşı, xalqımızın milli qürur və ləyaqətini bərpa etməyə imkan verib.

“Qalib Sərkərdə” kitabının önəmindən danışan polkovnik Cəlil Xəlilov qeyd edib ki, kitabda 44 günlük Vətən müharibəsinin hər günü, hər saatı öz əksini tapıb. Bu da Vətən müahribəsində Ordumuzun göstərdiyi qəhrəmanlığın, xalqımızın və Prezidentimizin sərgilədiyi fədakarlığın təbliği baxımından mühüm əhəmiyyətə malikdir.

Filologiya elmləri doktoru Şərəf Cəlili, “Modern Ailə və İnkişaf” İctimai Birliyinin sədri Zərifə Quliyeva, Xalq artisti, kinorejissor Şeyx Əbdül, deputat Ziyad Səmədzadə, kitabın ideya müəllifi və sahibkar Naiq Məmmədhəsənov kitabın əhəmiyyətindən danışıb, müəllifə yeni yaradıcılıq uğurları arzulayıblar.

Sonda “Qalib Sərkərdə” kitabının müəllifi Aygül Bağırova tədbirə gələn hər kəsə təşəkkürünü bildirib, Prezident İlham Əliyevin Azərbaycan xalqı qarşısındakı xidmətlərinin heç zaman unudulmayacağını vurğulayıb. O, 8 Noyabr Zəfərinin sonsuza qədər bütün Türk dünyasının ən böyük qələbələrindən biri kimi xatırlanacağını diqqətə çatdırıb.