Dekabrın 22-də Ailə, Qadın və Uşaq Problemləri üzrə Dövlət Komitəsinin təşkilatçılığı ilə istedadlı uşaqların “Qalib Ölkənin Qalibləri-2022” adlı mükafatlandırma mərasimi keçirilib.

AZƏRTAC xəbər verir ki, tədbirdə əvvəlcə Azərbaycanın Dövlət Himni səsləndirilib, ölkəmizin müstəqilliyi və ərazi bütövlüyü uğrunda aparılan mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad olunub.

Sonra bu il istedadlı uşaqların qazandıqları uğurları əks etdirən qısa videoçarx nümayiş etdirilib.

Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, Azərbaycan xalqının birliyi və bərabərliyi gələcəyimiz, gənclərimiz üçün çox vacibdir. Azərbaycan xalqı əsrin xalqı olmağı bacarıb, dünyada ölkəmizə qarşı münasibət getdikcə yaxşılaşır. Azərbaycanın əldə etdiyi uğurlar Ümummilli Lider Heydər Əliyevin strateji xəttinin nəticəsidir. Prezident İlham Əliyev isə Ulu Öndərin layiqli davamçısı olaraq ölkəmizin yüksələn xətlə inkişafına yönəlmiş qətiyyətli siyasəti davam etdirir.

Digər çıxış edənlər ölkəmizin 44 günlük Vətən müharibəsində qazandığı Qələbədən danışıblar. Bildirilib ki, bu Zəfərin əldə olunmasında ən böyük pay sahiblərindən biri də Azərbaycanın vətənpərvər övladlarıdır.

Mükafatlandırma mərasimində azyaşlı qaliblər tərəfindən milli və xarici musiqilər səsləndirilib.

Tədbirdə elm, təhsil, mədəniyyət və idman sahələrində il ərzində Azərbaycanı beynəlxalq Olimpiada və yarışlarda təmsil edərək qalib gəlmiş, eləcə də uşaq iştirakçılığı sahəsində fəallığı ilə seçilən uşaqlar mükafatlandırılıb