×
Bakıda Azərbaycan İnternet Forumu tərəfindən təsis edilən “MilliNet 2023” müsabiqəsinin mükafatlandırma mərasimi keçirilib.
AZƏRTAC xəbər verir ki, əvvəlcə Azərbaycan Respublikasının Dövlət Himni səsləndirilib. Sonra Ümummilli Lider Heydər Əliyevin və şəhidlərin xatirəsi bir dəqiqəlik sükutla yad edilib.
Tədbirdə çıxış edən Multimedia İnformasiya Sistemləri və Texnologiyaları Mərkəzinin direktoru, Azərbaycan İnternet Forumunun rəhbəri Osman Gündüz bildirib ki, "MilliNet" 15 il əvvəl təsis edilib və sonuncu dəfə beş il öncə mükafatlandırma mərasimi keçirilib. Azərbaycan İnternet Forumu tərəfindən təsis edilən “MilliNet” müsabiqəsinin keçirilməsində məqsəd Azərbaycan internetinin və informasiya texnologiyalarının inkişafına kömək etmək, ən yaxşı milli internet resurslarımızı üzə çıxartmaq və tanıtmaq, rəqabətli mühit formalaşdırmaq, informasiya texnologiyalarının populyarlaşmasına dəstək verməkdən ibarətdir.
Builki müsabiqə yenilikləri ilə fərqlənir. Belə ki, internet resurslarının qiymətləndirmə meyarları tamamilə yenilənib. Müsabiqəyə təqdim edilən resurslar əvvəlki üç istiqamət (dizayn, kontent və texniki) üzrə deyil, layihənin faydalılığı, əhəmiyyəti və əhatə dairəsi nəzərə alınmaqla qiymətləndirilib.
“MilliNet 2023” müsabiqəsi 13 nominasiya - “İlin rəqəmsal hökumət həlli”, “İlin rəqəmsal təhsil resursu”, “İlin rəqəmsal maliyyə həlli”, “İlin e-ticarət həlli”, “İlin rəqəmsal sosial resursu”, “İlin rəqəmsal səhiyyə və sağlamlıq resursu”, “İlin innovativ həlli”, “İlin rəqəmsal oyunu”, “İlin informasiya resursu”, “İlin süni intellekt həlli”, “İlin rəqəmsal mədəniyyət və turizm həlli”, “İlin rəqəmsal biznes həlli” və xüsusi nominasiya – “İlin rəqəmsal siması” üzrə keçirilib.
Tədbirdə çıxış edən Fərid Əhmədov, AMEA-nın vitse-prezidenti, İnformasiya Texnologiyaları İnstitutunun direktoru, akademik Rasim Əliquliyev, Azərbaycan Mətbuat Şurasının sədri Rəşad Məcid çıxış ediblər. Bildirilib ki, 15 il öncə internetə baxış tam fərqli idi. Bu gün isə artıq internet təməl hüquqlara və kommunal xidmətlərə daxildir. Artıq bu gün bütün xidmətlərin insanlar üçün rəqəmsal formada əlçatanlığını təmin etmək əsas məqsəddir. Bizneslərin rəqəmsal transformasiyası, bütün xidmətləri rəqəmsal platformaya keçirmək dövrüdür. Sevindirici haldır ki, artıq Azərbaycanda süni intellekt, informasiya texnologiyaları və informasiya-kommunikasiya texnologiyaları (İKT) sahəsində milli məhsullar yaradılır.
Sonra qaliblərin mükafatlandırma mərasimi keçirilib.
Qeyd edək ki, “Milli İnternet Mükafatı” Rəqəmsal İnkişaf və Nəqliyyat Nazirliyinin rəsmi dəstəyi ilə baş tutub.