“Medinex 2025” sərgisi çərçivəsində “Dialoqdan əməkdaşlığa: Ukrayna və Azərbaycanın əczaçılıq imkanları” mövzusunda panel təşkil edilib.

AZƏRTAC xəbər verir ki, Ukraynanın səhiyyə nazirinin müavini Edem Adamanovun moderatorluğu ilə keçirilən paneldə Azərbaycan və Ukrayna arasında əczaçılıq sahəsində mövcud əməkdaşlıq perspektivləri, investisiya imkanları və qarşılıqlı maraq doğuran digər məsələlər ətrafında geniş fikir mübadiləsi aparılıb.

Ukraynanın səhiyyə naziri Viktor Lyaşko qeyd edib ki, ölkəsi strateji tərəfdaşlarla, o cümlədən Azərbaycanla əczaçılıq sektorunda dayanıqlı və davamlı əməkdaşlıq qurmağa hazırdır. “Bu əməkdaşlıq dərman istehsalının inkişafını, keyfiyyət və təhlükəsizlik standartlarının yüksəldilməsini, həmçinin regional səhiyyə sistemlərinin gücləndirilməsini təmin edə bilər. Həmçinin bu sərgidə Ukraynanın aparıcı istehsalçılarının təmsil olunması bizə qarşılıqlı öyrənmə və təcrübə mübadiləsi üçün böyük fürsət yaradıb. Biz bu imkanlardan səmərəli istifadə etmək və əməkdaşlığı yeni səviyyəyə qaldırmaq niyyətindəyik”, - deyə o əlavə edib.

Nazir vurğulayıb ki, Azərbaycan ilə Ukrayna arasında əczaçılıq sahəsində qurulacaq tərəfdaşlıq həm strateji, həm də iqtisadi baxımdan faydalı olacaq: “Biz müxtəlif müzakirələrə, fikir mübadiləsi və yeni layihələrə həmişə hazırıq”.

Ukrayna Parlamentinin üzvü Mixayil Radutskiy panelin əsas məqsədinin Ukrayna və Azərbaycanın əczaçılıq sənayesi arasında ticarət əlaqələrini dərinləşdirmək, birgə layihələrin həyata keçirilməsi üçün zəmin yaratmaq və iki ölkənin dərman təhlükəsizliyini möhkəmləndirmək olduğunu diqqətə çatdırıb.

Azərbaycan Əczaçılar Assosiasiyasının sədri Tahir Süleymanov qeyd edib ki, Azərbaycan əczaçılıq bazarı dinamik inkişaf mərhələsindədir və yerli istehsalı sürətləndirmək üçün beynəlxalq tərəfdaşlıq olduqca vacibdir: “Əsas diqqətimiz kadr hazırlığı, elmi əməkdaşlıq və keyfiyyət standartlarının tətbiqi sahəsində təcrübə mübadiləsinə yönəlməlidir”.

Ukraynanın əczaçılıq şirkəti “Farmak”ın korporativ kommunikasiya direktoru Yevgeniya Piddubna Azərbaycan bazarının mühüm tərəfdaş olduğunu deyib: “Biz yalnız dərman idxal etmək deyil, həm də bilik və texnologiya transferi ilə maraqlanırıq”.

Ukraynanın “Biopharma Plasma” şirkətinin strateji inkişaf direktoru Oksana Plotnikova isə əczaçılığın pandemiya və müharibə şəraitində xüsusi önəm kəsb edən sahə olduğunu vurğulayıb: “Bakıda keçirilən bu sərgi əczaçılıq sahəsinin perspektivini araşdırmaq və bu təcrübəni bölüşmək üçün ideal platformadır”.

Daha sonra Ukraynanın səhiyyə naziri Viktor Lyaşko sərgi ilə tanış olub, ölkəsinin stendini ziyarət edib.