Azərbaycan media nümayəndələrinin Özbəkistana press-turu çərçivəsində jurnalistlər Özbəkistanın “IT Parkı”nın fəaliyyəti ilə tanış olublar.

AZƏRTAC xəbər verir ki, səfər çərçivəsində Özbəkistanda rəqəmsal iqtisadiyyatın inkişafı, texnologiya şirkətləri və startaplar üçün əlverişli ekosistemin yaradılması, ixtisaslı IT mütəxəssislərin hazırlanması, xarici investisiyaların cəlb edilməsi, habelə rəqəmsal xidmətlərin ixracının və innovativ sahibkarlığın dövlət tərəfindən dəstəklənməsi sahəsində həyata keçirdiyi siyasət təqdim olunub.

“IT Park Uzbekistan”ın birbaşa xarici investisiyalarla iş və şirkətlərlə əlaqələr üzrə meneceri Azamat Rahmon-Zoda bildirib ki, “IT Park” dünyanın 104 ölkəsi, o cümlədən Azərbaycandan olan IT şirkətləri ilə əməkdaşlıq edir. “IT Park”ın strukturunda 14 regional filial və 6 beynəlxalq nümayəndəlik fəaliyyət göstərir. Ekosistem mindən çoxu ixracyönümlü və mindən çoxu xarici şirkət olmaqla, ümumilikdə 3800-ə yaxın texnologiya şirkətini birləşdirir.

Press-tur iştirakçılarına ölkənin kadr potensialının inkişafı barədə məlumat təqdim olunub. Özbəkistanda 129 mindən çox tələbənin təhsil aldığı 145 IT universiteti fəaliyyət göstərir, 500-dən çox IT mərkəzi isə hər il 55 mindən çox məzun hazırlayır. “One Million Uzbek Coders” proqramı çərçivəsində 2 milyondan çox insan təlim keçib. Dövlət həmçinin beynəlxalq IT sertifikatların dəyərinin 100 faizədək hissəsini kompensasiya edir.

Ölkədə startap ekosisteminin inkişafına xüsusi diqqət ayrılır. Onun ümumi dəyəri 4,3 milyard dolları ötür. Ölkədə 1,6 mindən çox startap və iki “unikorn” şirkət var. Hər il ümumi mükafat fondu 11 milyon dollar olan üç beynəlxalq startap müsabiqəsi keçirilir. Ekosistem həmçinin ümumi kapitalı 200 milyon dollardan çox olan 22 fondu birləşdirir.

Təqdimat zamanı qeyd olunub ki, Özbəkistanın texnologiya şirkətləri təxminən 2,8 milyard dollar dəyərində rəqəmsal xidmətlər göstərir və 100-dən çox ölkəyə 1 milyard dollardan artıq məbləğdə xidmət ixrac edir.

Təqdimatın mühüm hissələrindən biri dövlət idarəçiliyinin rəqəmsal transformasiyası ilə tanışlıq olub. “Rəqəmsal Özbəkistan – 2030” strategiyası çərçivəsində 3,3 mindən çox rəqəmsal layihə həyata keçirilib. 160 növ arayış və sənəd ləğv edilib, 150-dən çox lisenziya və icazənin onlayn formatda əldə edilməsinin mümkünlüyü qeyd edilib.

Bundan əlavə, ölkədə 800-dən çox elektron dövlət xidməti fəaliyyət göstərir. Təkcə 2025-ci ildə bu xidmətlərdən 42 milyondan çox istifadə olunub. Milli xidmət portalı 15 milyondan çox istifadəçini və 900-dən çox inteqrasiya olunmuş sistemi birləşdirir.

Press-tur çərçivəsində Azərbaycan jurnalistləri Özbəkistanın texnoloji infrastrukturunun imkanları, rəqəmsal xidmətlərin inkişafı, həmçinin xarici IT şirkətləri və investorlar üçün yaradılan şəraitlə də tanış olublar. Vurğulanıb ki, Özbəkistan rəqəmsal iqtisadiyyatı və IT sektorunu iqtisadi artımın, yeni iş yerlərinin yaradılmasının, ixracın genişləndirilməsinin və ölkənin qlobal texnoloji ekosistemə inteqrasiyasının əsas hərəkətverici qüvvələrindən biri hesab edir.