İqtisadi İslahatların Təhlili və Kommunikasiya (İİTKM) Mərkəzinin nəzdində fəaliyyət göstərən “İslahat Könüllüləri” Təşkilatının yeni saytının təqdimat mərasimi keçirilib.

AZƏRTAC xəbər verir ki, tədbirdə Gənclər və İdman Nazirliyi, Gənclər Fondu, Rəqəmsal İnkişaf və Nəqliyyat Nazirliyinin nümayəndələri, Azərbaycan Könüllü Təşkilatları İttifaqının sədri və üzv təşkilatların rəhbərləri iştirak edib.

“İslahat Könüllüləri” Təşkilatının rəhbəri İsmət Vaqifzadə bildirib ki, gənclər arasında innovativ və texnoloji yeniləşmə, modernləşmə əsas hədəflərdəndir. Belə ki, Azərbaycan beynəlxalq hesabatlarda müxtəlif sahələr üzrə rəqəmsallaşma göstəricisinə görə dünyada öndə gedən ölkələrdəndir. Asiya İnkişaf Bankının 2021-ci il üzrə illik hesabatına görə Azərbaycan pandemiya dövründə rəqəmsal təhsilə sürətlə keçən ölkələrdən olub. Bütün bu göstəricilər ölkəmizdə könüllülük hərəkatının da rəqəmsallaşmağına imkan yaradır.

Qeyd edək ki, “İslahat Könüllülər” Təşkilatı 2016-cı ildə İİTKM-in nəzdində fəaliyyətə başlayıb. 300-dən çox könüllünün məzun olduğu təşkilatın əsas məqsədi gənclərin iqtisadi və analitik sahədəki mövcud potensialını üzə çıxarmaq və ondan səmərəli istifadə etmək, həmçinin bacarıqlı kadr kimi formalaşmasına dəstək olmaqdır.