“İrəli” İctimai Birliyi Milli Mətbuatımızın 150 illiyinə həsr olunmuş “Gənclərin media savadlılığının artırılması” layihəsinə start verib.

Layihə çərçivəsində ilk infotur Azərbaycan Dövlət İnformasiya Agentliyinə (AZƏRTAC) təşkil olunub.

İnfoturun iştirakçıları agentliyin binasında Ümummilli Lider Heydər Əliyevin, Prezident İlham Əliyevin və birinci xanım Mehriban Əliyevanın müxtəlif tədbirlərdə iştirakını, yerli və xarici mediaya müsahibələrini, Müzəffər Ali Baş Komandanımızın İkinci Qarabağ müharibəsi dövründə xalqa müraciətlərini, işğaldan azad olunmuş bölgələrə səfərlərini əks etdirən fotostendlərə, həmçinin AZƏRTAC-ın müxtəlif dövrlərdə istifadə etdiyi texniki avadanlıqların nümunələrindən ibarət muzeyə baxıblar.

AZƏRTAC-ın əməkdaşlarının Vətən müharibəsi zamanı cəbhəboyu zonada fəaliyyətinin əks olunduğu fotostendlər, şəhid jurnalist Məhərrəm İbrahimovun xatirə guşəsi gənclərin diqqətini cəlb edib. Gənclərə şəhid jurnalist Məhərrəm İbrahimovun AZƏRTAC-dakı 17 illik fəaliyyəti barədə məlumat verilib, onun Vətən müharibəsi dövründə ən qaynar nöqtələrdən xəbərləri operativ çatdırmasından, postmüharibə dövründə isə işğal zamanı şəhərlərimizdə, kəndlərimizdə törədilən dağıntıları lentə almasından bəhs edilib. Təəssüflə qeyd edilib ki, xidməti vəzifələrinin icrası ilə əlaqədar işğaldan azad edilmiş Kəlbəcərə ezam olunmuş bir qrup jurnalisti aparan “KamAZ” markalı sərnişin avtomobilinin 2021-ci il iyunun 4-də rayonun Susuzluq kəndində tank əleyhinə minaya düşməsi nəticəsində çəkiliş qrupunun iki üzvü – Məhərrəm İbrahimov və Sirac Abışov, habelə Kəlbəcər Rayon İcra Hakimiyyətinin nümayəndəsi Arif Əliyev şəhid olub, daha 4 nəfər isə yaralanıb. Ölümündən sonra M.İbrahimov Azərbaycan Prezidenti İlham Əliyevin Sərəncamı ilə 3-cü dərəcəli “Vətənə xidmətə görə” ordeni ilə təltif olunub. 39 illik ömrünə böyük işlər sığdıran Məhərrəm İbrahimovun hər zaman AZƏRTAC-ın kollektivi tərəfindən dərin ehtiramla xatırlandığı, onun fəaliyyətinin agentliyin əməkdaşları üçün örnək olduğu qeyd edilib.

Videoinformasiya baş redaksiyasının fəaliyyəti ilə tanış olan gənclərə audiovizual kontentin hazırlanması qaydaları barədə məlumat verilib. Onlar studiyaya və efir otağına baş çəkib, montaj və səsyazma prosesi barədə məlumatlandırılıblar.

İctimai birliyin üzvləri Azərbaycan, rus, ingilis dillərində informasiya baş redaksiyaları, o cümlədən qlobal kommunikasiya və informasiya idarəsinin fəaliyyəti ilə də tanış olmaq imkanı əldə ediblər.

“Müasir dövrdə mediada dezinformasiya və faktlarla manipulyasiya” adlı infosessiya zamanı isə AZƏRTAC-ın baş buraxılış redaktoru Pərvin Abbasov 8 dildə xəbər hazırlayan və Azərbaycan həqiqətlərini dünyanın dörd bir yanına çatdıran AZƏRTAC-ın fəaliyyətindən bəhs edib. O, istər Vətən müharibəsində, istərsə də postmüharibə dövründə informasiya müharibəsinin davam etdiyini, Azərbaycan mediasının ölkəmizə qarşı dezinformasiya və manipulyasiyalara faktlarla cavab verdiyini vurğulayaraq dedi: “Məlumdur ki, ötən il Bakıda keçirilən COP29 tədbiri ilə bağlı ölkəmiz yenə dezinformasiyalar hədəfinə çevrilmişdi. Qısa müddətdə möhtəşəm infrastruktur yaratmağı bacaran Azərbaycan qarayaxma kampaniyalarına yüksəksəviyyəli işi ilə son qoydu, COP29 tarixi nailiyyətlərlə, dünyamız, planetimiz üçün vacib qərarların qəbul edilməsi ilə yekunlaşdı. Təşkilatçılığın və tarixi nailiyyətlərin sübutu həm də qonaqlardan, xarici mütəxəssislərdən, beynəlxalq səviyyəli qurumların nümayəndələrindən alınan müsahibələrdir. Azərbaycan mediası yenə də şər-böhtanlara faktlarla tutarlı şəkildə cavab verdi. AZƏRTAC-ın kollektivi də COP29 tədbirlərini ən yüksək səviyyədə işıqlandırmağa nail oldu. Ölkənin informasiya məkanında xəbərlərin sayına görə lider olan AZƏRTAC xəbərlərini geniş coğrafiyada yaydı. Təbii ki, Prezident İlham Əliyev də Azərbaycan mediasının əməyini yüksək qiymətləndirərək jurnalistləri “Təşəkkürnamə” ilə təltif etdi”.

Xəbər hazırlanarkən mütləq rəsmi mənbələrə istinadın, həssas təbəqələrin nəzərə alınmasının vacibliyini diqqətə çatdıran P.Abbasov yanlış informasiyanın yarada biləcəyi fəsadlardan söhbət açıb.

Görüşdə gəncləri maraqlandıran suallar cavablandırılıb.