Bu gün Auditorlar Palatası, Azərbaycan Professional Maliyyə Menecerləri Assosiasiyası və Azərbaycan Qiymətləndiricilər Cəmiyyətinin birgə təşkilatçılığı ilə “Hesabatlılıq və şəffaflıq yeni dövrün çağırışları kontekstində” forum keçirilib.
×
Bu gün Auditorlar Palatası, Azərbaycan Professional Maliyyə Menecerləri Assosiasiyası və Azərbaycan Qiymətləndiricilər Cəmiyyətinin birgə təşkilatçılığı ilə “Hesabatlılıq və şəffaflıq yeni dövrün çağırışları kontekstində” forum keçirilib.
AZƏRTAC xəbər verir ki, forumun keçirilməsində əsas məqsəd iqtisadi islahatların indiki mərhələsində müstəqil hesabatlılığı, audit və qiymətləndiricilər institutunu inkişaf etdirmək, onun təsirliliyini artırmaq, bu sahələrdə rəqəmsallaşma işini tətbiq etmək və beynəlxalq aləmə inteqrasiyasını gücləndirmək sahəsində Prezident İlham Əliyevin tövsiyə və tapşırıqlarının həyata keçirilməsinin ölkəmizin iqtisadiyyatının inkişafı istiqamətində qarşıya qoyulmuş məqsədlərin reallaşdırılmasında mühüm töhfə verməkdir.
Auditorlar Palatasının sədri, professor Vahid Novruzov, Azərbaycan Professional Maliyyə Menecerləri Assosiasiyasının İdarə Heyətinin sədri Nuriyyə Novruzova və Azərbaycan Qiymətləndiricilər Cəmiyyətinin sədri Vüqar Oruc forumun əhəmiyyətindən bəhs ediblər. Qeyd edilib ki, ölkədə mühasiblərə, auditorlara, maliyyəçilərə və qiymətləndiricilərə daim dövlət dəstəyi olub, xüsusən son illərdə Prezident İlham Əliyevin rəhbərliyi altında bu sahələrin inkişafına göstərilən diqqət və qayğı sayəsində hesabatlılıq təkmilləşdirilib, kölgə iqtisadiyyatı azaldılmış və şəffaflıq artırılıb. Bu da öz növbəsində ölkəmizdə fəaliyyət göstərən sahibkarların işinin daha da yaxşılaşdırılmasına zəmin yaradıb.
Forumun yekunu olaraq ümumi fikir ondan ibarət olub ki, müasir şəraitdə yüksək şəffaflığa nail olunması üçün audit, mühasibat-maliyyə və qiymətləndirmə xidmətlərində dayanıqlı inkişafın, hesabatlılığın təkmilləşdirilməsi və şəffaflığın artırılması ilə əlaqədar müəyyən edilmiş kompleks tədbirlər bu sahələrin qabaqcıl təcrübəyə uyğun yenidən qurulmasına imkan verəcək.
Sonda Forumda Prezident İlham Əliyevin rəhbərliyi ilə ölkədə davamlı iqtisadi inkişafa nail olunması istiqamətində gördüyü işlərə dəstək nümayiş etdirilməsinə dair iştirakçılar tərəfindən Bəyanat qəbul edilib.