Ümumdünya Leykemiya (Qan Xərçəngi) ilə Mübarizə Günü münasibətilə maarifləndirici konfrans keçirilib.

AZƏRTAC xəbər verir ki, tədbir “EMEDIA GROUP” Media Təşkilatının təşkilatçılığı ilə “Güclü ümid – Sağlam gələcək” layihəsi çərçivəsində reallaşdırılıb.

Konfransın əsas məqsədi cəmiyyətdə leykemiya ilə bağlı məlumatlılığın artırılması, erkən diaqnostikanın və vaxtında müalicənin rolunun diqqətə çatdırılması, həmçinin xəstəliklə üzləşən şəxslərə və onların ailələrinə mənəvi dəstək göstərilməsidir.

Tədbirdə çıxış edən “EMEDIA GROUP” Media Təşkilatının sədri Elşən Əliyev bildirib ki, leykemiya yalnız tibbi deyil, ailə, cəmiyyət və dövlət səviyyəsində həmrəylik tələb edən sosial məsələdir. O, dövlətin sosial siyasətində vətəndaşların sağlamlığının qorunması, xəstəliklərlə üzləşən şəxslərin dövlət qayğısı ilə əhatə olunması və sosial müdafiəsinin gücləndirilməsinin mühüm istiqamətlərdən olduğunu vurğulayıb.

“Leykemiya ilə Mübarizə” İctimai Birliyinin sədri Mehriban Bağırova leykoz diaqnozunun insanlar üçün tibbi və psixoloji baxımdan ciddi sınaq olduğunu deyib. Onun sözlərinə görə, bu səbəbdən cəmiyyətin xəstəlik barədə düzgün məlumatlandırılması, pasiyentlərə və onların yaxınlarına anlayışla yanaşılması önəmlidir. Mehriban Bağırova qan və qan komponentlərinə ehtiyacı olan pasiyentlər üçün könüllü donor dəstəyinin də mühüm rol oynadığını qeyd edib, qanvermə mədəniyyətinin inkişaf etdirilməsinin vacibliyini vurğulayıb.

Milli Məclisin Səhiyyə komitəsinin üzvü, deputat Müşfiq Məmmədli leykemiya diaqnozu təyin olunan xəstələrə və onların ailələrinə dövlət qurumları, qeyri-hökumət təşkilatları və ictimaiyyət tərəfindən kompleks dəstəyin göstərilməsinin vacib olduğunu söyləyib. Deputat, həmçinin səhiyyə sahəsində dövlət tərəfindən həyata keçirilən tədbirlərə toxunaraq, tibbi xidmətlərin əlçatanlığının artırılması və icbari tibbi sığorta çərçivəsində imkanların genişləndirilməsi istiqamətində atılan addımları diqqətə çatdırıb. O, eyni zamanda, QHT-lərin, media nümayəndələrinin və vətəndaş cəmiyyətinin bu istiqamətdə birgə fəaliyyətinin əhəmiyyətli olduğunu vurğulayıb.

Milli Məclisin Ailə, qadın və uşaq məsələləri komitəsinin üzvü, deputat Günay Ağamalı leykemiya və digər onkoloji xəstəliklər zamanı erkən müdaxilənin əhəmiyyətini vurğulayıb. O, bu diaqnoz qoyulan uşaqların və onların valideynlərinin mənəvi və psixoloji baxımdan dəstəklənməsinin vacibliyini önə çəkib.

Konfransda “Güclü ümid – Sağlam gələcək” sosial-maarifləndirici videoçarxının təqdimatı da keçirilib. Bildirilib ki, videoçarxda xəstəliklə mübarizədə ümidin, iradənin və həyata inamın gücü əks olunub.