“Google” şirkəti pandemiya dövrü başlayandan istifadəçilərin internetdəki davranışlarını araşdırıb.

AZƏRTAC xarici KİV-lərə istinadla xəbər verir ki, həmin davranışlar əsasında şirkət ortaya çıxmış 3 yeni tendensiyanı aşkar edib:

- “#WithMe” həştəqi ilə paylaşılan videoların məşhurlaşması. Bu cür videoların müəllifləri istifadəçiləri yeni bir şeyləri öyrənməyə və ya boş zamanı hansısa üsul ilə dəyərləndirməyə çağırırlar. Sözügedən həştəq ilə yayılan “YouTube” videolarının baxış sayları martın 15-dən aprelin 15-dək 600 faiz yüksəlib. Mayın 13-nə kimi olan göstəriciyə əsasən ümumilikdə bu cür videolar 24 milyon dəfə izlənilib.

- istifadəçilərin evdə zamanın necə keçirilməsi barədə daha çox maraqlanmaları. “Evdə etmək” üzrə aparılmış axtarış sorğularının nəticəsi də fevralın 26-dan aprelin 25-dək 600 faiz artıb.

- karantin zamanı istifadəçilərin daha əvvəllər pul ödəyib etdirdikləri şeyləri özlərinin etmələri. Buna misal olaraq fərdi şəkildə saç kəsimini və ya tərəvəz əkimini göstərmək olar. Məsələn, adında “yeni başlayanlar üçün” və “addım-addım” yazılmış təlimat videolarının baxış sayı keçən ilin mart ayı ilə müqayisədə bu ilin eyni ayında 65 faiz çoxalıb.