“Birgə və sağlam” İctimai Birliyinin ilk irimiqyaslı təşəbbüsü Autizm Mərkəzinin yaradılması və 2017-ci ildə autizm sahəsində müasir terapiyanı Azərbaycana gətirilməsi olub. Hazırda mərkəzdə 60 mütəxəssisin xidməti ilə yüzə yaxın autizmli şəxs xüsusi təhsil alır. 2021-ci ilin dekabrında Autizm Mərkəzinin yeni binası açılıb və onun idarə olunması İctimai Birliyə həvalə edilib. Bu ilin aprelində Gəncədə açılan Autizm Mərkəzi isə həmin sindromdan əziyyət çəkənlərə ödənişsiz xidmət göstərir. İnklüziv dəyərlərin təşviqi və inklüzivlik mədəniyyətinin təbliği məqsədilə öz seqmentində ölkəmizdə ilk və yeganə iaşə xidməti obyekti olan “Kaşalata” kafesi yaradılıb və onun bütün heyəti inklüziv tərkibə malik işçilərdən ibarətdir.

Bu il “İnklüziv İnkişafa Dəstək Mərkəzi” adlı əlavə təhsil müəssisəsi təsis edilib, autizm haqqında kütləvi maarifləndirmə işləri aparmaq üçün autizm portalı yaradılıb. Portal bp və tərəfdaşlarının dəstəyi ilə həyata keçirilən sosial layihə çərçivəsində hazırlanıb, onun məzmun və texniki parametrləri təkmilləşdirilib. İndiyədək Azərbaycan Dövlət Pedaqoji Universiteti, Azərbaycan Dillər Universiteti və Mingəçevir Dövlət Universiteti ilə Anlaşma Memorandumu imzalanıb. Bu il “Birgə və Sağlam” İctimai Birliyi 40 Avropa ölkəsindən 90 üzv təşkilatı özündə birləşdirən Autism-Europe Beynəlxalq Qeyri-Kommersiya Assosiasiyasına üzv seçilib.

AZƏRTAC xəbər verir ki, bu barədə “Birgə və Sağlam” İctimai Birliyinin 10 illiyinə həsr olunan mərasimdə bəhs olunub.

Bir sıra dövlət və özəl qurumların, ali təhsil müəssisələrinin, qeyri-hökumət təşkilatı nümayəndələrinin iştirakı ilə keçirilən tədbirdə İctimai Birliyin Məşvərət Şurasının sədri Natəvan Məmmədova öz çıxışında qeyd edib ki, təşkilatın başlıca məqsədi autizm spektr pozuntusu olan şəxslər üçün təhsil, səhiyyə və sosial xidmətlərdə bərabər imkanları təmin etmək, autizm haqqında maarifləndirmə işləri aparmaq və inklüziv cəmiyyətin təşəkkülünə töhfə verməkdir.

“Birgə və Sağlam” İctimai Birliyinin sədri Aytən Eynalova autizmli şəxslərin və onların ailələrinin dəstəklənməsi üçün QHT-lərin dövlət qurumları və özəl sektorla sıx əməkdaşlıq etməsinin vacibliyindən bəhs edib və onların təşəbbüslərini dəstəkləyən tərəfdaşlara minnətdarlığını bildirib.

Birliyin əməkdaşı Fərid Süleymanov on illik fəaliyyət barədə hesabat xarakterli təqdimatla çıxış edib.

“Birgə və Sağlam”a daim dəstək və yardım göstərən 27 təşkilat və şəxsə “Autizm dostu” diplomu təqdim edilib.

Tədbir birliyin “Mavi ürəklər” xor və ritm qrupu üzvlərinin hazırladığı inklüziv konsert proqramı ilə yekunlaşıb.