Gəncliyə Yardım Fondunun təşkilatçılığı ilə iyunun 5-də “Bir uşağın sabahına işıq ol!” şüarı ilə XXII Ənənəvi Xeyriyyə Sərgisi keçirilib.

AZƏRTAC xəbər verir ki, sərginin açılış mərasimində Azərbaycandakı diplomatik korpusun nümayəndələri, ictimai xadimlər, elm adamları, media təmsilçiləri, Türkiyənin qeyri-hökumət təşkilatlarının rəhbərləri və iş adamları iştirak ediblər.

Tədbir torpaqlarımızın azadlığı və ölkəmizin suverenliyi uğrunda mübarizədə canlarından keçmiş şəhidlərin xatirəsinin bir dəqiqəlik sükutla yad edilməsi ilə başlayıb. Daha sonra Azərbaycan və Türkiyənin Dövlət himnləri səsləndirilib.

Gəncliyə Yardım Fondunun prezidenti Salih Zeki Meriç tədbirdə çıxış edərək bildirib ki, Azərbaycan xalqı tarix boyu ehtiyacı olanın yanında olmağı, yardım etməyi və paylaşmağı mənəvi borc hesab edib.

Salih Zeki Meriç xeyriyyəçiliyin təkcə maddi yardım deyil, həm də vicdanın, mərhəmətin və insan sevgisinin təzahürü olduğunu vurğulayıb.

Türkiyənin Azərbaycandakı səfiri Birol Akgünün həyat yoldaşı Zöhrə Akgün çıxışında sərginin təşkilində əməyi olanlara təşəkkürünü bildirib. Onun sözlərinə görə, Azərbaycan ilə Türkiyə arasında qardaşlıq münasibətləri yalnız siyasi və iqtisadi sahələrdə deyil, həm də xeyriyyəçilik və sosial həmrəylik kimi mənəvi dəyərlərdə özünü göstərir. “Bu gün burada nümayiş olunan birlik və paylaşma ruhu cəmiyyətlərimizin ən gözəl xüsusiyyətlərindən biridir”, – deyə Zöhrə Akgün vurğulayıb.

Şimali Kipr Türk Respublikasının Bakıdakı nümayəndəliyinin rəhbəri Ufuk Turganer xeyriyyəçilik təşəbbüslərinin cəmiyyətlər arasında həmrəyliyi gücləndirdiyini və sosial məsuliyyət hissini artırdığını qeyd edib.

“Bizim Ailə” jurnalının baş redaktoru doktor Gülnarə Seyidova təşkilat komitəsi adından çıxış edərək sərginin keçirilməsinin məqsədləri barədə məlumat verib.

O bildirib ki, builki sərgidən əldə olunacaq vəsait Gəncliyə Yardım Fondunun “Bir uşağın sabahına işıq ol!” layihəsinə yönəldiləcək. Layihə çərçivəsində valideyn himayəsindən məhrum olmuş uşaqlara və ehtiyac sahibi ailələrin övladlarına dəstək göstərilməsi nəzərdə tutulur.

Xeyriyyə sərgisi iki gün davam edəcək.