İyulun 6-da Bakıda regionun əsas investisiya və startap tədbiri olan “Bakı İnvestisiya Günü”nün (“Baku ID”) açılış mərasimi olub.

AZƏRTAC xəbər verir ki, mərasimdə çıxış edən “Sabah.Hub” İnnovasiya Mərkəzinin rəhbəri Rəhim Bayramlı artıq ikinci dəfə keçirilən "Bakı İnvestisiya Günü"nün əhatə dairəsini genişləndirdiyini söyləyib. O, bu platformanın təkcə startaplar və investorlar üçün deyil, həm də bu sahədə maraqlı olan digər tərəflərə töhfəsini verəcəyinə əminliyini ifadə edib.

Bildirib ki, bu il tədbirdə regionun ən yaxşı startap layihələri ilə yanaşı, beynəlxalq startaplar, mindən çox investorlar, partnyorlar, icma üzvləri - bir sözlə, innovasiya şəbəkəsinin bütün üzvləri iştirak edir.

Tədbir çərçivəsində 200-dən çox startapın investor qarşısında çıxışı, "one-2-one" investorlarla görüşlər, panel çıxışlar, müsabiqə və açıq hava konserti baş tutacaq.

Açılışda çıxış edən təhsil naziri Emin Əmrullayev bildirib ki, tədbir “Sabah.Hub” və Sabah Akademiyasının birgə təşkilatçılığı ilə keçirilir. Tədbirin əsas mahiyyəti həm Azərbaycanda, həm Sabah Akademiyasında il ərzində fəaliyyət göstərən müxtəlif startapların həm təqdimatı, onlar arasında keçiriləcək müsabiqənin, eyni zamanda investorlarla onlar arasında əlaqənin qurulmasıdır.

Nazir vurğulayıb ki, müsabiqə vasitəsilə tədbirə 2500-dək yerli, 200-dən çox xarici iştirakçı qatılıb.

“Sabah.Hub”ın mahiyyəti ondan ibarətdir ki, hər bir tələbə ali təhsil müəssisəsini bitirdikdən sonra bir sahibkar olaraq iş yeri yarada bilər. Öz ideyalarını reallaşdıra biləcək bir sahibkar formasında yetişməsinə xidmət edir. Ona görə də müxtəlif ali təhsil müəssisələrin 4-cü kursunda oxuyan tələbələri artıq "Aİ Business school" ilə bərabər, “Sabah.Hub”ın təşkil etdiyi kurslara cəlb edirik. Həmin o kursları bitirdikdən sonra isə onlara öz ideyaları əsnasında yeni şirkətlər, yeni formatların yaradılmasında dəstək göstəririk", - deyə nazir bildirib.

Həmçinin tədbirdə İRİA-nın sədr əvəzi İnarə Vəliyeva “Gələcək ekosistemin inşası üçün proqramlar və hökumət dəstəyi”, beynəlxalq biznesin inkişafı üzrə rəhbər Loukas Tzitzis “Çətinlikdən zirvəyə: şəxsi çətinlikləri dayanıqlılığa çevirmək”, məsləhətçi İqor Ovçarenko “Tükənmişlikdən balansa doğru: yüksək stresli karyeralarda möhkəm qalmağın sirri” panellərində çıxış edəcəklər.

Tədbirdə startap və investor şirkətlərin stendləri sərgilənir.