Gələn il Bakıda keçiriləcək Beynəlxalq Astronavtika Konqresinə dünyanın 100-dən çox ölkəsindən 6 mindən artıq qonağın gəlməsi planlaşdırılır.

AZƏRTAC xəbər verir ki, bu sözləri “Azərkosmos”un İdarə Heyətinin sədri Saməddin Əsədov Bakının ev sahibliyi edəcəyi Beynəlxalq Astronavtika Konqresi ilə əlaqədar Azərbaycanda fəaliyyət göstərən səfirlik və diplomatik nümayəndələrlə keçirilən görüşdə deyib.

“Konqreslə bağlı ölkəmizə gələcək qonaqların viza məsələlərini hava limanında, qısa zamanda həll etməyə çalışacağıq. Bugünkü görüşümüzün məqsədi Konqresin regionumuz üçün əhəmiyyətini, o cümlədən kosmik sahədə iştirak edən ölkələrin təcrübə mübadiləsi imkanlarını səfirlik və diplomatik nümayəndələr vasitəsilə dünya ölkələrinə çatdırmaqdır. Ölkəmizə gələcək qonaqların viza, logistika və digər sahələrdə problem yaşamaması üçün birgə çalışmalıyıq", - deyə o əlavə edib.