Oktyabrın 30-da Sosial Təhqiqatlar Mərkəzinin (STM) və Azərbaycan Respublikasının insan hüquqları üzrə müvəkkilinin (ombudsman) birgə təşkilatçılığı ilə “Azərbaycanlılara qarşı nifrət cinayətləri və nifrət nitqi” hesabatının təqdimatı ilə bağlı konfrans keçirilib.

AZƏRTAC xəbər verir ki, konfransda “Azərbaycanlılara qarşı nifrət cinayətləri və nifrət nitqi” bağlı videoçarx nümayiş olunub.

Tədbirdə çıxış edən Sosial Tədqiqatlar Mərkəzinin (STM) İdarə Heyətinin və Milli Məclisin İnsan hüquqları komitəsinin sədri Zahid Oruc deyib ki, bir millətin digərindən üstünlüyünü iddia edən ari irq iddiasının - faşist ideologiyasının tərkib hissəsi kimi “nifrət nitqi” yalnız tribunlardan, kitablardan, efirdən, mətbu orqanlardan səslənməklə məhdudlaşıb qalmır, sonra dağıdıcı qüvvələrin əlində gerçək qırğın aktlarına, qanlı terror əməllərinə və əbədi savaşlara səbəb olur.

O qeyd edib ki, xalqımıza qarşı həyata keçirilən belə nifrət cinayətlərinin ən böyüyü 7 rayonun yer üzündən silinməsidir. Əks halda, sual olunur: “bir dövlət özününkü saydığı torpaqlarda əsrlərlə yaradılan maddi-mədəni sərvətləri niyə dağıtsın ki?

Məsələn, on illər ərzində türk məfhumunu “düşmən” sözünün sinonimi kimi tirajlayanlar məişətdən dövlət səviyyəsinə qədər bir-biri ilə o dildə danışıblar. Əlbəttə, ailə tərbiyəsinin kanonları burada mühüm rol oynayır. Ermənistan baş nazirinin etirafı ictimai leksikonun və siyasi məfkurənin nə qədər zəhərləndiyini göstərir. N.Paşinyandan sitat: “mənə “türk nikol” deyirlər. Lakin mən bunu təhqir saymıram”. Göründüyü kimi, şüurlara əkilən zərərli toxumlar təkcə Türkiyə və Azərbaycana deyil, elə ermənilərin özünə də zərbə vurur.

Deputat bildirib ki, qatı nifrət nümunələrindən biri Robert Koçaryanın beynəlxalq kürsüdən səsləndirdiyi ksenofob, irqçi, şovinist “genetik uyğunsuzluq” bəyanatı idi. Barışıq və əmin-amanlığı dəyərsizləşdirən, millətləri biolojiləşdirən, Avropa ailəsinin üzvü olmaq istəyən səhra komandirinin tayfa təfəkkürü göz qabağındadır.

Yaxud beynəlxalq ictimaiyyətdə ziyalı, professor kimi tanınan Giorgi Derlunqyan “Civilnet” platformasında azərbaycanlıları nəzərdə tutaraq “onlar kəndçi millətidir, təbii artımları üçüncü dünya ölkələrindəki kimidir” açıqlaması alim statusundan uzaqdır, çünki elmdə belə bölgülərə yer yoxdur.

Onun sözlərinə görə, işğal dövründə internet platformalarında ermənilərin azərbaycanlılara yönəltdiyi aşağılayıcı diskurslar - “döyüşməyi bacarmayan alverçilər”, “köçəri millət”, “primitiv köçərilər” və sair epitetlər daşlaşmış zehinlərin göstəricisi idi, çünki müharibə tam fərqli gerçəkliyi - 100 minlərlə qəhrəman azərbaycanlı obrazını ortaya qoydu.

“Qarabağ komitəsinin üzvü İqor Muradyanın Tomas de Vaala müsahibəsində “Qarabağın azərbaycanlı sakinləri haqqında nə düşünürdünüz” sualına “onların fikri və aqibəti heç kimi maraqlandırmırdı” cavabı Miatsum fəallarının anti-humanist mahiyyətini, insan ləyaqətini hesaba almayan kimliklərini ortaya qoyur. Üçüncü Reyx də milyonlara məhrumiyyət gətirən ideologiyanı oxşar tezislər üzərində qurmuşdu.

Ermənistanın hərbi məğlubiyyətinin səbəbi döyüş meydanlarında qarşılarına fərqli kimliklərin çıxması idi. Əzmkarlıqla savaşan azərbaycanlı əsgər və 5-ci nəsil texnologiyalarını idarə edən zabitlər, bütün sosial və siyasi ayrılıqları kənara qoyan vahid millət, ləyaqətli savaş nümunəsi yaradan Azərbaycan dövləti gerçək obrazı ilə düşmənin təsəvvürlərini dağıtdı.

Üstəlik, nifrət dilini bizə beynəlxalq təşkilatlar, avroparlamentarilər və qərbli məmurlar, lobbistlər və məhkəmə salonlarında hakimlər, vəkillər həyata keçirir. Lakin ölkəmizə qarşı informasiya və diplomatik yöndə nifrət savaşı aparanlar məğlub olacaqlar”, - deyə Z.Oruc vurğulayıb.

O diqqətə çatdırıb ki, Prezident İlham Əliyevin ən böyük qələbəsi Qafqazda axan qanı durdurması, bölgəmizə dincliyi, əmin-amanlığı, mübadiləni, bütövlüyü gətirməsi, bir sözlə, nifrətə son qoymasıdır.

Azərbaycan ombudsmanı Səbinə Əliyeva bildirib ki, 44 günlük müharibə dövründə Ermənistan silahlı qüvvələri tərəfindən əsir alınan azərbaycanlı hərbi qulluqçuların əsirlik dövründə qarşılaşdıqları işgəncə və təzyiqlər tərəfimizdən hesabat şəklində hazırlanaraq beynəlxalq qurumların diqqətinə çatdırılıb. Azərbaycan torpaqlarının işğaldan azad olunması dövründə Azərbaycan Silahlı Qüvvələri tərəfindən heç bir mülki obyekt və mülki əhali hədəfə alınmayıb.

Qeyd edilib ki, həmin döyüşlər zamanı Ermənistan silahlı qüvvələri tərəfindən müxtəlif yollarla hədəf yayındırmağa çalışaraq mülki əhaliyə, o cümlədən jurnalistlərə, din xadimlərinə və hətta uşaqlara hərbi geyimlər və silahlar verilib.

Ombudsman vurğulayıb ki, 2020-ci ilin iyul və avqust aylarında onlarla azərbaycanlı ABŞ, İngiltərə, Rusiya, Ukrayna, Belçikada erməniəsilli tələbələr tərəfindən xüsusi amansızlıqla döyülüb, həmçinin psixoloji təzyiqlərə məruz qalıb. Azərbaycan bayraqları ilə dinc şəkildə yürüşlər keçirən azərbaycanlılara göstərilən təzyiqə və hətta ölümlə təhdidə dair kifayət qədər material mövcuddur.

Xarici işlər nazirinin müavini Elnur Məmmədov azərbaycanlılara qarşı etnik nifrət nitqi yayan şəxslərin Ermənistan dövləti tərəfindən himayə olunduğunu bildirib. Nazir müavini deyib ki, Ermənistan hökumətinin etnik təmizləmə siyasəti nəticəsində “azərbaycanlılarla ermənilərin bir yerdə yaşaya bilmədiyi” təbliğatı bu gün də davam edir. “Ermənilərin ideologiyalarında türklərə nifrət, onlara qarşı mübarizə aparmaq təlqin olunur. Ermənistanın sabiq prezidentləri Serj Sarkisyan və Robert Köçəryan çıxışlarında vurğulayıblar ki, azərbaycanlılar və ermənilər uyğun deyil, onlar birgə yaşaya bilməzlər. Ermənistan dövləti nifrət nitqinə “söz azadlığı” donu geyindirib məsuliyyətdən yayınmağa çalışır. Azərbaycan xalqına qarşı törədilmiş bu cinayətlər təsadüfi xarakter daşımır. Bu, ermənilərin uzun illərdir davam edən ideologiyasıdır”, - deyə E.Məmmədov bildirib.

O diqqətə çatdırıb ki, Azərbaycan dövləti 2020-ci il müharibəsindən sonra sülh sazişi üçün Ermənistana dəfələrlə təklif göndərib. Amma buna baxmayaraq, qarşı tərəf müsbət davranış sərgiləmir.

Sonra çıxış edən Baş prokurorun müavini Elmar Camalov Qərbi azərbaycanlılara qarşı uzun illər aparılmış deportasiya və soyqırımı cinayətləri ilə bağlı Baş Prokurorluq tərəfindən cinayət işinin başlanıldığını deyib. Qeyd olunub ki, eyni zamanda, azərbaycanlı əsirlərə və girovlara qarşı törədilən cinayətlərlə bağlı istintaq aparılır. Ümumiyyətlə, XX əsrin müxtəlif dövrlərində ermənilərin azərbaycanlılara qarşı həyata keçirdiyi bütün cinayətlər araşdırılır.

O, həmçinin bildirib ki, ermənilərin mülki əhaliyə və infrastruktura ziyan vurması, qadağan olunmuş fosfor silahlarından istifadə etməsi məsələləri araşdırılır.

Elm və Təhsil Nazirliyinin Aparat rəhbəri Mətin Kərimli çıxışında vurğulayıb ki, xarici ölkələrdə azərbaycanlılara qarşı həyata keçirilən nifrət nitqi hər zaman olduğundan daha aktualdır. Azərbaycana qarşı bu istiqamətdə qarayaxma kampaniyası davam etdirilir.

“30 il ərzində işğal altında saxlanılan şəhərlərimizin, kəndlərimizin ermənilər tərəfindən tamamilə dağıdılması, vətəndaşlarımıza qarşı soyqırımı törədilməsi bu nifrətin əyani sübutudur",- deyə Aparat rəhbəri əlavə edib.

Konfrans mövzu ilə bağlı çıxışlarla davam edib.