Martın 3-də Bakıda “Azərbaycanda yol təhlükəsizliyinin gücləndirilməsi” tvininq layihəsinin təqdimat mərasimi keçirilib. Mərasimdə bu təşəbbüsdə iştirak edən ölkələrin – Azərbaycan, Polşa və Litvanın müxtəlif maraqlı tərəfləri bir araya gəlib.

Tədbir, həmçinin tvininq layihəsində iştirak edən qurumlarla daha yaxından tanış olmaq, onun əhatə dairəsini və gözlənilən nəticələri ictimaiyyətə təqdim etmək imkanı yaradır.

Sözügedən layihə Avropa İttifaqı (Aİ) tərəfindən maliyyələşdirilir və birbaşa benefisiarı Azərbaycan Respublikasının Rəqəmsal İnkişaf və Nəqliyyat Nazirliyidir. Layihənin məqsədi ölüm və ya ağır sağlamlıq xəsarətləri və sosial-iqtisadi ziyanla nəticələnən yol-nəqliyyat hadisələrinin azaldılmasına töhfə vermək, Azərbaycanda yol hərəkəti təhlükəsizliyi məsələlərini daha yaxşı idarə etmək və əlaqələndirmək üçün aidiyyəti dövlət qurumlarının və digər maraqlı tərəflərin hüquqi və institusional imkanlarını, kadr potensialını təkmilləşdirməkdir.

AZƏRTAC xəbər verir ki, rəqəmsal inkişaf və nəqliyyat naziri Rəşad Nəbiyev çıxışında Prezident İlham Əliyevin həyata keçirdiyi sosial-iqtisadi inkişaf strategiyası çərçivəsində yol hərəkəti təhlükəsizliyinin artırılması və yol-nəqliyyat infrastrukturunun yaxşılaşdırılması istiqamətində görülmüş işlər barədə məlumat verib.

Qeyd edilib ki, dövlətimizin səylərinə baxmayaraq, hələ də ölkədə hər 100 min avtomobil sayına görə yol qəzalarında ölüm sayı çoxdur. Bu da ölkəmizin sosial-iqtisadi inkişafı ilə uyğunluq təşkil etmir.

Rəşad Nəbiyev əlavə edib ki, bu istiqamətdə irəliləyişə nail olmaq üçün Prezidentin Sərəncamı ilə təsdiq edilmiş “Yol hərəkətinin təhlükəsizliyinə dair 2019-2023-cü illər üçün Dövlət Proqramı” icra olunmaqdadır.

“Bu gün təqdimatını etdiyimiz “Azərbaycanda yol hərəkətinin təhlükəsizliyinin gücləndirilməsi” tvininq layihəsi də əslində Dövlət Proqramının bir sıra müddəalarını əhatə edir. Layihə Azərbaycanda yol hərəkətinin təhlükəsizliyinə dair məsələlərin daha yaxşı idarə olunması, əlaqələndirilməsi və həll edilməsi baxımından böyük əhəmiyyət daşıyır. Bu vacib layihəni maliyyələşdirdiyinə görə Avropa İttifaqına təşəkkür edirəm”, – deyə Rəşad Nəbiyev vurğulayıb.

Tədbirdə Avropa İttifaqının Azərbaycandakı Nümayəndəliyi, Polşa və Litva respublikalarının Azərbaycandakı səfirliklərinin nümayəndələri təqdimatla çıxış ediblər.

Layihənin əhatə dairəsi tvininq üzrə rezident məsləhətçi və Polşa və Litvanın ekspertləri tərəfindən təqdim olunub.

“Bugünkü konfrans layihənin rəmzi başlanğıcıdır, layihə hazırda icra mərhələsindədir. Biz artıq əsas benefisiarımız Rəqəmsal İnkişaf və Nəqliyyat Nazirliyi, digər əsas maraqlı tərəflər və Aİ-nin Azərbaycandakı Nümayəndəliyi ilə yaxşı əməkdaşlıq münasibətimizi qürurla qeyd edə bilərik. Yol hərəkətinin təhlükəsizliyi Polşa İnfrastruktur Nazirliyi üçün də ən yüksək prioritetdir və bu istiqamətdə davamlı monitorinq, qiymətləndirmə və təkmilləşdirmə işləri aparılır”, – deyə Polşanın infrastruktur nazirinin müavini Andjey Bittel vurğulayıb.

CEUTP-nin direktoru Yoanna Lex deyib: “Bildirmək istəyərdim ki, Aİ Nəqliyyat Layihələri Mərkəzi (CEUTP) və layihənin bütün tərəfdaşları yol təhlükəsizliyinin hüquqi aspektləri, texnologiya, tətbiqetmə və sonuncu, lakin ən önəmli olan təhsil sahələrində ən yaxşı təcrübə və töhfə verməyə qərarlıdırlar. Hər birimiz razılaşa bilərik ki, yol təhlükəsizliyi uşaq bağçası və ibtidai məktəb səviyyəsində düzgün istifadəçi təhsilindən başlayır”.

“Polşa və Litvadan olan ekspertlər qrupu məktəblər üçün düzgün yol hərəkəti təhlükəsizliyi üzrə təhsil proqramının hazırlanmasında, yol hərəkəti təhlükəsizliyinin bütün iştirakçıları və maraqlı tərəflər üçün lazım olan əsas bacarıqların müəyyən edilməsində və nəhayət, Azərbaycan Respublikasının Rəqəmsal İnkişaf və Nəqliyyat Nazirliyinə dəstək məqsədilə bütün lazımi bacarıqları bir araya gətirir, xüsusi yol təhlükəsizliyi kampaniyasını hazırlamağa və həyata keçirməyə kömək edir. Bütün bunlar layihənin Azərbaycanda yol təhlükəsizliyi strategiyasında dərin kök salan əsas məqsədlərinə çatmağa yönəldilib”, – deyə LTSA, üzv dövlətin kiçik tərəfdaş layihə rəhbəri Yustas Raşomaviçus bildirib.