Sentyabrın 22-də “ADEX 2026”- 6-cı Azərbaycan Beynəlxalq Müdafiə Sərgisinə və “Securex Caspian” -15-ci Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinə həsr olunmuş mətbuat konfransı keçirilib.

AZƏRTAC xəbər verir ki, tədbirdə Müdafiə Sənayesi Nazirliyi Aparatının rəhbəri Samir Ağabalayev, "Caspian Event Organisers" şirkətinin baş direktoru Fərid Məmmədov, Müdafiə Sənayesi Nazirliyi Aparatının Beynəlxalq strateji əməkdaşlıq şöbəsinin müdiri Gülsüm Rzayeva, Müdafiə Sənayesi Nazirliyi Aparatının mətbuat xidməti sektorunun müdiri Nərmin Əhmədova, eləcə də “ADEX” və “Securex Caspian” sərgilərinin layihə rəhbəri Ülkər Qasımova çıxış ediblər.

Tədbirdə media nümayəndələri, müvafiq dövlət strukturlarının təmsilçiləri və tədbirin təşkilat komitəsinin üzvləri iştirak ediblər.

Mətbuat konfransının əsas hissəsi başa çatdıqdan sonra iştirakçılar və media nümayəndələri üçün Zəfər Muzeyinə tur təşkil olunub. Tur çərçivəsində iştirakçılar muzeyin ekspozisiyası ilə yaxından tanış olublar.

30 sentyabr - 2 oktyabr tarixlərində Bakı Ekspo Mərkəzində Qafqaz regionunun nəhəng hərbi-texnoloji platforması olan və müdafiə sənayesinin qlobal güclərini bir araya gətirən “ADEX 2026” – 6-cı Azərbaycan Beynəlxalq Müdafiə Sərgisi keçiriləcək. Paralel olaraq, 15-ci Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi - “Securex Caspian” təşkil ediləcək.

Sərgi Azərbaycanın Müdafiə Sənayesi Nazirliyinin təşəbbüsü və təşkilatçılığı, Müdafiə Nazirliyinin dəstəyi ilə keçirilir. Sərginin təşkilatçısı “Caspian Event Organisers” şirkətidir.

“ADEX” sərgisinin baş sponsoru “Roketsan” şirkəti, ölkə tərəfdaşı sponsoru isə “Northrop Grumman” şirkətidir. Sərginin sponsorları qismində, həmçinin “Absheron Hotel Group”, “Accurate MMC” və “Bilboard.al” şirkətləri çıxış edir.

“ADEX” və “Securex Caspian” barədə yenilənən məlumatları sərgilərin rəsmi internet saytlarından (www.adex.az və www.securexcaspian.az) və sosial şəbəkə hesablarından əldə etmək mümkündür.