Azərbaycan mədəniyyətinin beşiyi olan, azərbaycanlılar üçün müqəddəs məkan sayılan Şuşaya ilk səfərimdir. Dağlar qoynunda yerləşən əsrarəngiz təbiətə malik Şuşanı bu gün azad görmək çox xoşdur. Bu gözəl şəhərin öz sahiblərinə qayıtması qürurvericidir və bir Türkiyə vətəndaşı olaraq məni çox mütəəsir etdi.

AZƏRTAC xəbər verir ki, bu fikirləri Əl-Cəzirə Media Şəbəkəsinin İstanbul şöbəsinin əməkdaşı Yılmaz Akınçı Şuşaya səfəri zamanı deyib.

Beynəlxalq media nümayəndəsi vurğulayıb ki, Azərbaycan xalqının və dövlətinin əzmi, qüdrəti və gücü sayəsində 30 ilə yaxın işğal altında olan torpaqlar öz azadlığına qovuşdu. Onun sözlərinə görə, insan üçün doğma evi çox müqəddəsdir.

Yılmaz Akınçı deyib: “Bu torpaq ona görə müqəddəsdir ki, bura Azərbaycanın Dövlət Himnini yazan dahi bəstəkar Üzeyir Hacıbəyli və tanınmış digər musiqi xadimlərinin vətənidir. Şuşa həm də öz Vətəni və xalqı üçün canından keçən şəhidlərin ruhu ilə müqəddəsdir. Şəhərin tarixini öyrəndikcə, onun Azərbaycanın tarixində önəmli yeri olduğunu və məhz sizin xalqa məxsusluğunu görməmək mümkün deyil. Şuşa öz tarixi kökləri və qədimiliyi ilə bunu açıqca deyir”.

Əl-Cəzirə kanalının əməkdaşı təəssüflə bildirib ki, ermənilər 30 ilə yaxın qanunsuz zəbt etdikləri Azərbaycan torpaqlarında hər şeyi məhv ediblər, ekoloji və insan terroru ilə məşğul olublar: “İşğalçı ölkə tərəfindən bu torpaqlara heç bir sərmayə qoyulmaması da bunu sübut edir. Sübut edir ki, onlar bu torpağın sahibi deyillər. Mən bunu Əfqanıstanda, Suriyada münaqişə zonasında olan bir jurnalist kimi deyirəm. Bu torpaqların əsl sahibləri qayıdıblar və biz yolboyu nəhəng yol-tikinti və bərpa-quculuq işlərinin həyata keçirildiyinin şahidi olduq”.