Yevlax rayonunun yaşayış məntəqələrinin qazlaşdırılması yekunlaşmaq üzrədir.

AZƏRTAC-ın bölgə müxbiri xəbər verir ki, cari ildə rayonun Nəmirli, Dəlləklər, Göyük kəndlərində və Tanrıqulular kəndində yeni salınmış məhəllədə qazlaşma işləri aparılıb. Bununla da Yevlax rayonunun 50 yaşayış məntəqəsindən 49-u təbii qazla təmin olunub.

Rayonun Bəydili kəndinin qazlaşdırılması üçün daşıyıcı və paylayıcı xətlər çəkilib. Hazırda son tamamlanma işləri aparılır - mənzildaxili qaz xətləri çəkilir, fərdi qaz tənzimləyicisi və sayğaclar quraşdırılır. Bəydili kəndində də işlər yekunlaşandan sonra Yevlax rayonunun yaşayış məntəqələrinin qazlaşdırılması 100 faizə çatacaqdır.