Bakı Şəhər Probasiya İdarəsində yetkinlik yaşına çatmayan məhkumların peşəyönümlü ixtisaslara yönləndirilməsi, onlar tərəfindən törədilə biləcək hüquq pozuntularının qarşısının alınması, narkomaniyanın acı nəticələrinə dair maarifləndirmə tədbiri keçirilib.
×
Bakı Şəhər Probasiya İdarəsində yetkinlik yaşına çatmayan məhkumların peşəyönümlü ixtisaslara yönləndirilməsi, onlar tərəfindən törədilə biləcək hüquq pozuntularının qarşısının alınması, narkomaniyanın acı nəticələrinə dair maarifləndirmə tədbiri keçirilib.
AZƏRTAC xəbər verir ki, tədbirdə respublika və Bakı narkoloji mərkəzlərinin həkim narkoloqları, “Ümidli Gələcək” Sosial Təşəbbüslər İctimai Birliyinin psixoloqları və yetkinlik yaşına çatmayan məhkumlar, eləcə də onların valideynləri iştirak ediblər.
Tədbirdə çıxış edən “Ümidli Gələcək” Sosial Təşəbbüslər İctimai Birliyinin icraçı direktoru Kəmalə Aşumova, qurumun psixoloqu Gülşən Axundova, Bakı Şəhər Narkoloji Dispanserinin həkim-narkoloqu Günay Babayeva narkomaniyanın hazırda cəmiyyətin ən böyük qlobal problemlərindən biri olduğunu bildiriblər. Qeyd edilib ki, narkomanlığa və narkotik maddələrin qeyri-qanuni dövriyyəsinə qarşı mübarizəyə cəmiyyətin bütün üzvləri qoşulmalı, hər bir qurum, hər bir ailə narkomanlığın profilaktikası sahəsində bacardığını əsirgəməməlidir. Narkomaniya xəstəliyinə tutulmaq təkcə hər hansı bir fərd üçün deyil, eyni zamanda, bütün cəmiyyət üçün təhlükəlidir. Narkomaniyanın yalan, cinayət, ailələrin dağılması, ölümcül xəstəliklər və sair kimi bəlalar gətirdiyi və insanları fəlakətə sürüklədiyi diqqətə çatdırılıb.
Sonra cəmiyyətdə tüğyan edən “ağ ölüm” adlandırılan narkomaniyanın acı nəticələrinin əyani şəkildə göstərilməsi məqsədilə film nümayiş etdirilib.
Qeyd edək ki, Bakı Şəhər Probasiya İdarəsində azadlıqdan məhrumetmə ilə əlaqədar olmayan cəzalara məhkum edilmiş yetkinlik yaşına çatmayan 21 məhkumla idarənin icra məmurları tərəfindən qanunvericiliyin tələblərinə uyğun tədbirlər reallaşdırılmaqla onların islah edilməsi, sosial adaptasiya və reabilitasiyası istiqamətində, həmçinin peşəyönümlü ixtisaslara yiyələnmələri məqsədilə məhkumların özləri, valideynləri, təhsil müəssisələri, qeydiyyatda olduqları rayonlar üzrə icra hakimiyyətlərinin nəzdində fəaliyyət göstərən yetkinlik yaşına çatmayanların işləri və hüquqlarının müdafiəsi üzrə komissiyalarla, müxtəlif qeyri-hökumət təşkilatları ilə sıx əlaqə yaratmaqla zəruri tədbirlər həyata keçirilir.