Bütün proqressiv cəmiyyətlər üçün vətəndaş mövqeyi xüsusi əhəmiyyət kəsb edir. Bu, ona görə belədir ki, həmin cəmiyyətlər üçün vətəndaş mövqeyi, o mövqeyi şərtləndirən fərdi və ictimai məsuliyyət inkişaf və sabitliyin potensial təminatçısı sayılır.

AZƏRTAC xəbər verir ki, dekabrın 14-də Yeni Azərbaycan Partiyası (YAP) Veteranlar Şurası və YAP Gənclər Birliyinin təşkilatçılığı ilə partiyanın Mərkəzi Aparatında “Vətəndaş mövqeyi: fərdi və ictimai məsuliyyət” mövzusu üzrə keçirilən konfransı YAP Veteranlar Şurasının sədri Arif Rəhimzadə bu sözlərlə açıb.

Konfransın digər təşkilatçısı olan YAP Gənclər Birliyinin sədri Bəxtiyar İslamov hər bir gəncin, xüsusilə təmsilçisi olduğu təşkilat üzvlərinin vətəndaş mövqeyinin cəmiyyətin sağlam əsaslarla inkişafı üçün nə qədər vacib olduğunu bildirib. Birlik sədri ümummilli lider Heydər Əliyevin insanlarda ən yüksək keyfiyyət kimi qəbul etdiyi mövqe ifadəsinin həyatımız üçün nə qədər əhəmiyyət daşıdığını konkret faktlar əsasında xatırladıb.

YAP Veteranlar Şurasının, Gənclər Birliyinin üzvlərinin və fəallarının iştirak etdiyi konfrans Şuranın üzvü, fizika-riyaziyyat elmləri doktoru Şahlar Əsgərovun məruzəsindən sonra mövzu üzrə çıxışlar və diskussiya formatında polemikalarla yekunlaşacaq.

Konfransda, həmçinin YAP Veteranlar Şurasının üzvü, AMEA-nın Riyaziyyat və Mexanika İnstitutunun direktoru, fizika-riyaziyyat elmləri doktoru Misir Mərdanov, YAP Mərkəzi Aparatının şöbə müdiri, siyasi elmlər üzrə fəlsəfə doktoru Rufiz Qonaqovun çıxışları gözlənilir.