Yazıçı, filologiya elmləri namizədi Səyyad Aran memarı ümummilli lider Heydər Əliyev olan müasir dövlətimizin siyasi həyatında aparıcı rola malik Yeni Azərbaycan Partiyasının yaradılmasında xidmət göstərmiş insanlardan biridir. O, qələmi ilə də Partiyanın ideologiyasının yayılması, cəmiyyətdə bərqərar olması üçün əlindən gələni əsirgəməyib.

Bu fikirləri yazıçı, filologiya elmləri namizədi Səyyad Aranın 70 illik yubileyi münasibətilə tədbiri giriş sözü ilə açan YAP Səbail rayon təşkilatının sədri Muxtar Nağıyev ifadə edib.

O, Səyyad Aranın həyatını cəmiyyət üçün yararlı işlərə həsr etdiyini bildirərək deyib: “Təsadüfi deyil ki, S.Aranın 70 illik ömür yolu YAP-ın Sədri, Azərbaycan Respublikasının Prezidenti İlham Əliyev tərəfindən yüksək qiymətləndirib, o, "Şöhrət” ordeni ilə təltif edilib".

Digər çıxış edənlər - Rizvan Vahabov, Hacan Hacıyev və başqaları Səyyad Aranı siyasətçi, ictimai xadim kimi xarakterizə edib, onun istedadlı ədəbiyyat adamı kimi də fərqləndiyini bildiriblər.

Yeni Azərbaycan Partiyasının veteranlarından biri, yazıçı-publisist, Dini Qurumlarla İş üzrə Dövlət Komitəsi sədrinin birinci müavini, Əməkdar jurnalisti Səyyad Aran onun ictimai-siyasi fəaliyyətinə, ədəbi yaradıcılığına verilən yüksək qiymətə görə təşəkkürünü bildirərək deyib: “Xoşbəxtəm ki, bugünkü Azərbaycanın simasını müəyyənləşdirən ümummilli lider Heydər Əliyevin əsgəri olmaq, onun yaratdığı YAP-ın ərsəyə gəlməsi prosesində çalışmaq taleyi yaşamışam. Azərbaycanı qüdrətli, qalib ölkə kimi tanıdan Müzəffər Ali Baş Komandan, Prezident İlham Əliyevin rəhbərliyi ilə respublikamızın inkişafı üçün səylərimi bundan sonra da əsirgəməyəcəyəm”.

Sonda YAP Səbail rayon təşkilatı adından yubilyara xatirə hədiyyəsi təqdim olunub.