Xidmətim müddətində bir çox döyüş əməliyyatlarında, həmçinin Aprel döyüşlərində və Vətən müharibəsində iştirak etmişəm. Bu gün böyük fəxarət hissi duyuruq, çünki biz qalib Ordunun əsgərləriyik. Vətən müharibəsində Qələbə qazanmağımızda payı olan hər kəsə, xüsusilə Müzəffər Ali Baş Komandan, Prezident İlham Əliyevə və Azərbaycan xalqına təşəkkürümü bildirirəm. Bu müharibədə xalqımız bir amal uğrunda birləşdi və istəyinə nail oldu. Xalqımızın dəstəyi, analarımızın duası da bizə kömək etdi.

AZƏRTAC xəbər verir ki, bunu jurnalistlərə açıqlamasında Xüsusi Təyinatlı Qüvvələrin giziri Rəcəb Nəcəfov deyib.

Xüsusi Təyinatlı Qüvvələrin giziri bildirib: “Döyüş əməliyyatlarına Murovdağdan başladım. Sonra Qubadlı, Füzuli, Cəbrayıl, Xocavənd və Laçının düşmən işğalından azad olunmasında iştirak etdim. Qırx dörd günlük Vətən savaşında bütün Azərbaycan Ordusu igidlik, şücaət göstərdi. Bütün hərbçilərimiz Azərbaycan xalqının başını uca, alnını açıq etdilər”.

Qeyd edək ki, Müzəffər Ali Baş Komandan, Prezident İlham Əliyevin sərəncamları ilə R. Nəcəfov "Hərbi xidmətlərə görə" medalı, “Kəlbəcərin azad olunmasına görə”, “Füzulinin azad olunmasına görə”, “Cəbrayılın azad olunmasına görə” və “Xocavəndin azad olunmasına görə” medalları ilə təltif olunub.