Xorvatiya ölkəmizdəki səfirliyi və Azərbaycan Milli Konservatoriyasının birgə təşkilatçılığı ilə xorvatiyalı musiqiçilərdən ibarət “Klapa Bošket” vokal ansamblının konsert proqramı təqdim olunub.

AZƏRTAC xəbər verir ki, Milli Konservatoriyada təqdim edilən konsert proqramında “Spusta se mrak” (folk, arr. B. Jarcic) , “Dojdi u krilo moje” (trad, spontaneous singing) , “Pribrodit cu brodom”(folk, obd. M. Tasovac), “Kamposonto” (A. Nizetic - K. Magdic) əsərləri səsləndirilib.

Konsertdən öncə çıxış edən Azərbaycan Milli Konservatoriyasının rektoru, Xalq artisti Siyavuş Kərimi Xorvatiya və Azərbaycan arasında mədəniyyət sahəsində əməkdaşlığın daha da genişləndirilməsi üçün əlverişli imkanların mövcudluğunu qeyd edib.

Xorvatiyanın ölkəmizdəki səfiri Branko Zebiç çıxış edərək “Klapa Bošket” vokal ansamblı haqqında geniş məlumat verib. Bildirib ki, ansambl Xorvatiyanın Dalmaçiya vilayətində ənənəvi “A kapella” oxuma formasıdır. 2012-ci ildə ansambl UNESCO-nun qeyri-maddi mədəni irs siyahısına salınıb: “Klapa” sözü “dostlar qrupu” mənasını daşıyır və insanlar xorun köməyi ilə, harmoniya və ahəngdarlıq ifadə edirlər. Azərbaycan Milli Konservatoriyasının göstərdiyi səmimi əməkdaşlığa görə təşəkkür edirəm”.