Fevralın 18-də Ailə, Qadın və Uşaq Problemləri üzrə Dövlət Komitəsi (AQUPDK) və “Azərkitab” Kitab Mərkəzinin birgə təşkilatçılığı ilə “Erməni təcavüzünun tanıdılması” İctimai Birliyinin sədri, yazıçı, publisist Səriyyə Müslümqızının “Geriyə baxma” adlı kitabının təqdimatı keçirilib.

AZƏRTAC xəbər verir ki, tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova Xocalı faciəsini Azərbaycan xalqının tarixində ən ağrılı hadisə olduğunu deyib.

Komitə sədri diqqətə çatdırıb ki, torpağımızın sahibi olmaq haqqımızdır və biz öz torpaqlarımıza qayıtmışıq. Biz bu gün qalib xalq və dövlət olduğumuzu böyük fəxrlə deyirik. Xoşbəxtik ki, Prezident İlham Əliyev kimi rəhbərimiz və Müzəffər Ali Baş Komandanımız var. Azərbaycan xalqı qalib olduğunu bütün dünyaya nümayiş etdirdi.

Bahar Muradova qeyd edib ki, Xocalı soyqırımının tanınması Azərbaycanın xarici siyasətinin əsas istiqamətlərindən biridir və bu istiqamətdə mühüm sənədlər qəbul edilib. Amma əsas məqsəd bu faciəni törədənlərin beynəlxalq hüququn normaları çərçivəsində ədalət məhkəməsi qarşısında cavab vermələrinə nail olmaqdır. İnanırıq ki, ədalət gec-tez zəfər çalacaq və cinayətkarlar mühakimə olunacaqlar.

Komitə sədri vurğulayıb ki, dünya Xocalı faciəsindən ibrət götürməlidir. Azərbaycan bir daha imkan verməyəcək ki, onun dövlətinə və vətəndaşlarına gəc gözlə baxılsın. Azərbaycan erməni faşizminin baş qaldırmasına heç vaxt imkan verməyəcək.

"Biz Xocalını unutmuruq və unutdurmayacağıq", - deyən Milli Məclisin deputatı Hikmət Babaoğlu qeyd edib ki, Azərbaycan xalqı Vətən müharibəsində Zəfəri ilə Xocalıda şəhid olanların qisasını aldı, 30 il səbirlə gözləyərək mübarizəsini Qələbə ilə başa çatdırdı.

Sonra çıxış edən Milli Məclisin deputatı Ceyhun Məmmədov, Azərbaycan Yazıçılar Birliyinin sədr müavini Rəşad Məcid, “Zəfər” Şəhid Ailələrinə Dəstək İctimai Birliyinin təsisçisi Sevinc Alızadə, YAP Gənclər Birliyinin sədri Bəxtiyar İslamov, yazıçı, publisist, Əməkdar Jurnalist Zemfira Məhərrəmli, Azərbaycan İlahiyyat İnstitutunun Elm və İnnovasiyalar üzrə prorektoru Mirniyaz Mürsəlov ermənilərlə informasiya mübarizəsinin davam etdiyini, faciənin üstündən 30 il keçməsinə baxmayaraq, bu yaranın hələ də unudulmadığını, Vətən müharibəsində qazanılan Qələbə ilə Xocalı qurbanlarının qisasının alındığını vurğulayıblar.

Daha sonra çıxış edən kitabın müəllifi Səriyyə Müslümqızı bildirib ki, Azərbaycan 44 günlük Vətən müharibəsində Zəfər qazanaraq Ermənistanı döyüş meydanında təslim olmağa məcbur etdi. Amma onlar bizim Qələbəmizi həzm edə bilmirlər.

“Xocalıya ədalət!” kampaniyasının təşkilinə və dünyada bu faciənin tanıdılması istiqamətində fəaliyyətə görə təşəkkürünü ifadə edən Səriyyə Müslümqızı vurğulayıb ki, hər bir vətəndaş Xocalı həqiqətlərinin daha geniş təbliğ edilməsi üçün şox fəal olmalıdır. O dəhşətli gecəni ürək ağrısı ilə xatırlayan Xocalı sakini deyib ki, o vaxt qətlə yetirilən 106 qadından biri də onun anası olub.

Sonda müəllif kitabın türk dilində təqdimatının olacağını da bildirib.

Qeyd edək ki, Xocalı soyqırımının canlı şahidi olan Səriyyə Müslümqızı ermənilərin Qarabağda törətdikləri vəhşiliklərə və Xocalı soyqırımına həsr olunmuş 10-dan çox kitabın müəllifidir.