Uşaqlarda erkən mərhələdə əlilliyin profilaktikası və müalicəsi məqsədilə Milli Fəaliyyət Planı təsdiqlənib. Milli Fəaliyyət Planı çərçivəsində sağlamlıq imkanları məhdud, genetik, metabolik və hormonal pozuntuları olan uşaqlara tibbi-sosial dəstək məqsədilə dərman təchizatı nəzərdə tutulub. İcbari tibbi sığortanın ölkə üzrə tətbiqi başlandıqdan sonra İcbari Tibbi Sığorta üzrə Dövlət Agentliyinə hormonal pozuntularla bağlı müraciətlərin sayının çoxluğunu nəzərə alaraq Respublika Endokrinoloji Mərkəzində qısa müddət ərzində komissiya yaradılıb. Həmin komissiyaya İcbari Tibbi Sığorta üzrə Dövlət Agentliyinə müraciət etmiş vətəndaşlar, eyni zamanda, regionlarda dispanser qeydiyyatına alınmış uşaqlar haqqında məlumatlar toplanılıb. Komissiya çərçivəsində uşaqlar yenidən müayinələrdən keçirilərək boy hormonu çatmayanlar seçilib və tibbi göstəriş çərçivəsində onların dərman təminatına başlanılıb.

AZƏRTAC xəbər verir ki, bunu agentliyin şöbə müdiri Nərgiz Hacıyeva deyib.

Şöbə müdirinin sözlərinə görə, komissiya keçən ilin avqustundan fəaliyyətə başlayıb: “Vətəndaşlar Respublika Endokrinoloji Mərkəzinə, eyni zamanda, qeydiyyatda olduğu tibb müəssisələrinə müraciət edə, ailə həkimlərinin göstərişi əsasında ixtisaslı həkim müayinəsinə yönləndirilə bilərlər. Əgər uşaqlarda boy hormonu çatışmazlığı aşkarlanarsa, onlar dərhal komissiya çərçivəsində yenidən müayinədən keçirilir və tibbi göstəriş əsasında dərman preparatları ilə təchiz olunurlar. Ötən ilin sentyabrından etibarən qeydiyyata alınan uşaqların sayı 480-ə çatıb.

Xidmət Zərfinə yenidən baxılır, qısa zaman ərzində təsdiqlənəcək. Xidmətlər Zərfinə daxil olmamasına baxmayaraq, erkən mərhələdə əlilliyin profilaktikası və müalicəsi məqsədilə Milli Fəaliyyət Planı çərçivəsində boy hormonu çatışmazlığından əziyyət çəkən uşaqlar müvafiq dərman preparatları ilə təchiz olunurlar”.