XI Bakı Beynəlxalq Kitab Sərgisi çərçivəsində “Heydər Əliyevin vətən səfərləri” çoxcildliyinin təqdimatı keçirilib. Kitablar ikicildli ensiklopedik lüğəti və Ümummilli Lider Heydər Əliyevin ölkənin regionlarına səfərlərinə həsr olunmuş çoxcildli nəşri ehtiva edir.

AZƏRTAC xəbər verir ki, ensiklopedik cildlərdə Heydər Əliyevin Prezident olduğu illərdə Azərbaycanın bölgələrinə səfərləri, eləcə də Mərkəzi Komitənin, daha sonra Prezident Administrasiyasının aparatlarından kənarda Bakıda iştirak etdiyi tədbirlərə dair materiallar yer alıb.

Məqalələr ensiklopedik nəşrin meyarlarına uyğun olaraq xronoloji ardıcıllıqla tərtib edilib. Hər bir məqalə arxiv fotoşəkilləri ilə müşayiət olunur ki, bu da oxucuya həmin illərin ab-havasını daha dərindən hiss etməyə imkan verir.

Təqdimat mərasimində çıxış edən çoxcildliyin müəllifi Vəsimə İsmayılqızı kitabların ərsəyə gəlməsi ilə bağlı hekayəni bölüşüb. O, qeyd edib ki, bu kitabların nəşri sağlığında ən təvazökar təşəbbüsləri belə dəyərləndirən Heydər Əliyevin özünün göstərdiyi dəstək sayəsində mümkün olub.

“2001-ci ildə Goranboy haqqında ilk dəfə ensiklopedik toplu hazırladım. O vaxt məni şəxsən tanımayan redaktorların köməyi sayəsində bir nüsxə Dilarə Hüseynzadənin vasitəsilə Heydər Əliyevə çatdırıldı. Tezliklə məni Prezident Administrasiyasına dəvət etdilər”, -deyə müəllif bildirib.

O, həmçinin qeyd edib ki, şəxsi xatirələrdən də ilham alıb: “1978-ci ildə məktəbli olarkən Heydər Əliyevin Goranboya səfərinin şahidi oldum. Sonralar bu fikri Dilarə xanımla bölüşdüm və o, mənim baxışımı tam dəstəklədi. Həmin vaxtdan bəri fəaliyyətimin hər mərhələsində kömək, dəstək hiss etmişəm”.

Kitabın redaktoru İsmayıl Umudlu, “Azərnəşr” nəşriyyatının direktoru Əlövsət Ağalarov, Azərbaycan Yazıçılar Birliyinin Ədəbi Əlaqələr Mərkəzinin direktoru Əsəd Cahangir də kitab haqqında fikirlərini bölüşüblər. Onlar təqdim olunan çoxcildliyin əhəmiyyətini yüksək qiymətləndirib, həmçinin Heydər Əliyevin ölkə rəhbəri olduğu illərdə müstəsna rolunu və fəaliyyətini qeyd ediblər.

Qeyd edək ki, “Heydər Əliyevin vətən səfərləri” adlı ensiklopedik toplunun birinci cildi onun rəhbərliyinin ilk dövrünü əhatə edir və 2023-cü ildə – “Heydər Əliyev İli”ndə işıq üzü görüb.

İkinci cild sonrakı illərə həsr edilib. Onun nəşri Ümummilli Liderin anım gününə — 2025-ci il dekabrın 12-nə planlaşdırılır.